काठमाडौं (हाम्रो खेलकु) – चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगिता सेमिफाइनल समिकरण पूरा भएको छ । समूह चरणको अन्तिम खेलमा सोमबार नेपाल एपिएफ क्लबले त्रिभुवन आर्मी क्लबलाई ६ रनले हराएसँगै सेमिफाइनल समिकरण पूरा भएको हो ।
समूह ‘ए’ बाट नेपाल एपिएफ क्लब विजेता र त्रिभुवन आर्मी उपविजेताको रुपमा सेमिफाइनलमा प्रवेश गरेका छन् । समूह ‘बी’ बाट बागमती प्रदेश विजेता र पुलिस उपविजेताको रुपमा सेमिफाइनलमा पुगेका छन् ।
पहिलो सेमिफाइनलमा बुधबार एपिएफ र पुलिस भिड्नेछन् । बिहिबार दोस्रो सेमिफाइनलमा बागमती प्रदेश र आर्मीबीच प्रतिस्पर्धा हुनेछ । फाइनल शनिबार हुनेछ । सेमिफाइन र फाइनलका खेल टियु मैदानमा हुने छन् ।
समूह ‘ए’ बाट एपिएफ ४ खेलमा अपराजित हुँदै समूह विजेता बन्यो । आर्मी ४ खेलमा ३ मा जित र १ मा हार सहित ६ अंकका साथ दोस्रो स्थानमा रह्यो । समान ४ खेलमा ३ मा हार र १ मा जित सहित २–२ अंकका साथ क्रमश : कर्णाली तेस्रो, प्रदेश एक चौथो र गण्डकी पुछारमा रहँदै बाहिरिए ।
बागमती ४ खेलमा ३ मा जित र १ मा बराबरीका साथ ७ अंकका साथ समूह बी बाट विजेता बन्यो । पुलिस ४ खेलमा ३ मा जित र १ मा हार सहित ६ अंंकका साथ दोस्रो स्थानमा रह्यो । लुम्बिनी ४ खेलमा २ मा जित, १ मा हार र १ मा बराबरीका साथ ५ अंकका साथ तेस्रो स्थानमा रहँदै बाहिरियो ।
सुदूरपश्चिम ४ खेलमा ३ मा हार र १ मा जित सहित चौथो स्थानमा रह्यो । प्रदेश २ चार खेलमानै पराजित हुँदै अंकविहिन हुँदै बाहिरियो । प्रदेश २ पहिलो पटक प्रधानमन्त्री कपमा जित विहिन हुँदै बाहिरिएको हो ।
