एजेन्सी – बंगलादेशले तेस्रो तथा अन्तिम ओडिआई खेलमा वेस्टइन्डिजलाई १ सय २० रनको फराकिलो अन्तरले हराउँदै सिरिजमा क्लिनस्विप गरेको छ ।

बंगलादेशले प्रस्तुत गरेको २ सय ९८ रनको विजयी लक्ष्य पछ्याएको वेस्टइन्डिज ४४.२ ओभरमा १ सय ७७ रनमा अल आउट भयो । वेस्टइन्डिजका रोभमन पवेलले ४९ बलमा २ चौका र २ छक्का सहित सर्वाधिक ४७ रनको योगदान दिए ।

एनक्रमाह बोनरले ३१, सुनिल एम्ब्रिस १३, जेसन मोहम्मद १७ र रेमन राइफरले २७ रन बनाउन बाहेक अन्यले राम्रो प्रर्दशन गर्न सकेनन् । बंगलादेशका मोहम्मद सैफुद्दिनले सर्वाधिक ३ विकेट लिए । मुश्ताफिजुर रहमान र मेहेदी हसनले २–२ विकेट लिए ।

त्यसअघि टस हारेर पहिला ब्याटिङको निम्तो पाएको बंगलादेशले निर्धारित ५० ओभरमा ६ विकेट गुमाउँदै २ सय ९७ रन बनाएको थियो । बंगलादेशका चार ब्याट्सम्यानले अर्धशतकीय इनिङ खेलेका थिए । ओपनर तथा कप्तान तमिम इकबालले ८० बलमा ३ चौका र १ छक्का सहित ६४ रनमा क्याच आउट भए ।

विकेटकिपर मुश्फिकुर रहिमले ५५ बलमा ४ चौका र २ छक्का सहित ६४ रनमा क्याच आउट भए । रियाद महमुदूल्लाह ४३ बलमा ३ चौका र ३ छक्का सहित ६४ रनमा अविजित रहे ।

ओपनर लिटन दासलाई पहिलो ओभरको पाँचौं बलमा अल्जारी जोशेफले शून्यमा एलबिडब्लू आउट गरेका थिए । नज्मुल हसन सान्टो २० रनमा एलबिडब्लू आउट हुन पुगे । सकीब अल हसनले ८१ बलमा ३ चौका सहित ५१ रनमा आउट भए । वेस्टइन्डिजका अल्जारी जोशेफ र रेमन राइफरले २–२ विकेट लिए ।

पहिलो ओडिआई खेलमा बंगलादेश ६ विकेट र दोस्रोमा ७ विकेटले विजयी भएको थियो । बंगलादेश र वेस्टइन्डिजबीच थप दुई टेष्ट खेल हुने छ । पहिलो टेष्ट फेब्रुअरी ३ देखि सुरु हुने छ ।