काठमाडौं (हाम्रो खेलकुद) – प्रदेश २ प्रधानमन्त्री कप एकदिवसिय क्रिकेट प्रतियोगितामा पहिलो पटक जितविहिन हुँदै बाहिरिएको छ । जारी प्रतियोगितामा समूह चरणबाट बाहिरिएका ६ प्रदेश मध्य जित विहिन हुने प्रदेश २ एक मात्र टोली हो ।

समूह चरणको अन्तिम खेलमा सोमबार प्रदेश २ नेपाल पुलिस क्लबसँग ४ विकेट पराजित हुँदै समूह बी बाट जित विहिन हुँदै बाहिरिएको हो । प्रधानमन्त्री कप प्रदेश संरचनामा गएपछि प्रदेश २ पहिलो पटक जित विहिन हुन पुगेको छ ।

प्रदेश २ जारी प्रतियोगितामा पहिलो खेलमा लुम्बिनी प्रदेशसँग ७७ रनले पराजित भएको थियो । दोस्रो खेलमा बागमती प्रदेशसँग ६ विकेटले हार्न पुगेको थियो । सुदूरपश्चिमसँग ३ विकेट र पुलिससँग ४ विकेटले पराजित हुँदै जित विहिन हुँदै बाहिरिएको हो ।

प्रदेश २ पहिलो पटक प्रधानमन्त्री कपमा जित बिहिन हुँदै बाहिरिएको छ । दोस्रो संस्करण अर्थात सन् २०१८ मा प्रदेश २ समूह ए बाट चौथो स्थानमा रहँदै बाहिएको थियो । उक्त प्रतियोगितामा ४ खेलमा ३ मा हार र १ मा जित निकालेको थियो । उक्त प्रतियोगितामा प्रदेश २ ले गण्डकीलाई ६७ रनले हराएको थयो । प्रदेश १ सँग ६८ रन, एपिएफसँग ९६ र आर्मीसँग ५५ रनले पराजित भएको थियो ।

२०१९ अर्थात तेस्रो संस्करणमा प्रदेश २ समूह बी बाट ४ खेलमा २ मा हार र २ मा जित सहित तेस्रो स्थानमा रहँदै बाहिरिएको थियो । प्रदेश २ आर्मीसँग १ सय ७१ रन र आर्मीसँग पुलिसँग १ सय ५६ रनको फराकिलो अन्तरले पराजित हुन पुगेको थियो । प्रदेश २ ले कर्णालीलाई ९ विकेट र प्रदेश १ लाई १ सय ६१ रनले हराएको थियो । यस पटक प्रदेश २ को घरेलु क्रिकेटमा सफल ब्याट्सम्यान हसिम अन्सारीलाई नै समेटेको थिएन ।

समूह ‘ए’ बाट एपिएफ ४ खेलमा अपराजित हुँदै समूह विजेता बन्यो । आर्मी ४ खेलमा ३ मा जित र १ मा हार सहित ६ अंकका साथ दोस्रो स्थानमा रह्यो । समान ४ खेलमा ३ मा हार र १ मा जित सहित २–२ अंकका साथ क्रमश : कर्णाली तेस्रो, प्रदेश एक चौथो र गण्डकी पुछारमा रहँदै बाहिरिए ।

बागमती ४ खेलमा ३ मा जित र १ मा बराबरीका साथ ७ अंकका साथ समूह बी बाट विजेता बन्यो । पुलिस ४ खेलमा ३ मा जित र १ मा हार सहित ६ अंंकका साथ दोस्रो स्थानमा रह्यो । लुम्बिनी ४ खेलमा २ मा जित, १ मा हार र १ मा बराबरीका साथ ५ अंकका साथ तेस्रो स्थानमा रहँदै बाहिरियो । सुदूरपश्चिम ४ खेलमा ३ मा हार र १ मा जित सहित चौथो स्थानमा रह्यो । प्रदेश २ चार खेलमानै पराजित हुँदै अंकविहिन बन्यो ।

पहिलो सेमिफाइनलमा बुधबार एपिएफ र पुलिस भिड्नेछन् । बिहिबार दोस्रो सेमिफाइनलमा बागमती प्रदेश र आर्मीबीच प्रतिस्पर्धा हुनेछ । फाइनल शनिबार हुनेछ । सेमिफाइन र फाइनलका खेल टियु मैदानमा हुने छन् ।