एजेन्सी – नेपाली लेगस्पिनर सन्दीप लामिछाने सम्मिलित होबार्ट हरिकेन्स बिग ब्यास लिग २०२०/२१ को लिग चरणबाटै बाहिरिएको छ । आफ्नो लिग चरणको अन्तिम खेलमा होबार्ट मेलबर्न रेनेगड्ससँग ११ रनले पराजित भएसँगै अघिल्लो चरणको सम्भावना सकिएको हो ।

जितको लागि १ सय ५१ रनको विजयी लक्ष्य पछ्याएको होबार्टले निर्धारित २० ओभरमा ९ विकेट गुमाउँदै १ सय ३९ रन बनायो । होबार्टका डेविड मलानले ३६ बलमा २ चौका सहित सर्वाधिक ३४ रनको योगदान दिए ।

डार्सी सर्ट २९, पिटर ह्यान्डस्कोम्ब १९, टिम डेविड १४, म्याथ्यु वेड र विल ज्याक्स १३–१३ रनमा आउट भए । अन्तिम बलमा ब्याटिङ गर्न आएका सन्दीप एक रन जोड्दै अविजित रहे । रेनेगड्सका ज्याक इभान्सले ४ ओभरमा ३३ रन खर्चेर ५ विकेट लिए ।

त्यसअघि मेलबर्न क्रिकेट मैदानमा टस हारेर पहिला ब्याटिङ थालेको रेनेगड्र्सले निर्धारित २० ओभरमा ५ विकेट गुमाउँदै १ सय ५० रन बनाएको थियो । रेनेगड्सका लागि तल्लोक्रमका ब्यूउ वेबस्टरले ३५ बलमा ४ चौका र १ छक्का सहित ५४ रनमा अविजित रहेका थिए ।

म्याकेन्जी हार्वेले ३७ बलमा १ चौका र २ छक्का सहित ४० रनको योगदान दिए । होबार्टका राइली मेरिडीथले ४ ओभरमा २२ रन खर्चेर ३ विकेट लिएका थिए । सन्दीपले ४ ओभरमा ३५ रन खर्चेपनि विकेट लिन सकेनन् ।

होबार्ट १४ खेलमा समान ७ मा जित र हार सहित २८ अंकका साथ छैटौं स्थानमा रहँदै बाहिरिएको छ । सन्दीपले ८ खेलमा ८ विकेट लिँदै होबार्टको यस सिजनको यात्रा सकाएका छन् ।

यस्तो रह्यो सन्दीपको चार ओभर

सन्दीपलाई होबार्टले आठौं ओभरमा बलिङमा ल्याएको थियो । त्यस समयमा रेनेगड्स ४३र ३ को अवस्थामा थियो । सन्दीपले आफ्नो सुरुवात डट बलका साथ गरेका थिए । आठौं ओभरको पहिलो बलमा म्याकेन्जी हार्वेलाई डट राखे ।

दोस्रो बलमा एक रन खर्चेका थिए । तेस्रो बलमा सन्दीपले साम हार्परलाई दुई रन दिएका थिए । चौथो बलमा एक, पाँचौं बलमा दुई र अन्तिम बलमा एक रन खर्चिदै पहिलो ओभर सकेका थिए ।

दशौं ओभरमा सन्दीपले ८ रन खर्चेका थिए । पहिलो बलमा वेबस्टरलाई एक रन दिए । दास्रो बलमा हार्बेलाई दुई रन दिए । तेस्रो बलमा एक रन दिँदा चौथो बलमा दुई रन खर्चिएका थिए । पाँचौं र छैटौं बलमा एक एक रन खर्चिए ।

१२ औं ओभरमा बलिङ गर्न आएका सन्दीपले विकेट लिन सकेनन् । कसिलो बलिङ गर्दै पाँच रन खर्चेका थिए । पहिलो बलमा एक र दोस्रो बलमा डट राखे । त्यसपछिका अन्य चार बलमा सन्दीपले १–१ रन खर्चेका थिए ।

१६ औं ओभरमा आफ्नो अन्तिम स्पेल लिएर आएका सन्दीपलाई पहिलो बलमै हार्वेले लङअनमा छक्का प्रहार गरेका थिए । दोस्रो र तेस्रो बलमा एक एक रन खर्चिए । चौथो बलमा हार्वेले लङअफमा छक्का प्रहार गरेका थिए । पाँचौ बलमा डट राख्दा अन्तिम एक रन खर्चिए । सुरुवाती तीन ओभरमा २० रन खर्चेका सन्दीपले अन्तिम ओभरमा १५ रन दिएका थिए ।

जारी बिग ब्यास लिगमा सन्दीप तेस्रो पटक विकेट विहिन बनेका हुन् । जारी सिजनकै कमजोर प्रर्दशन पर्दछ । यसअघि सन्दीप पर्थ स्कोचर्स र सिड्नी थन्डरविरुद्ध विकेन विहिन बनेका थिए । विकेटविहन बन्दा थन्डरविरुद्ध २८ र पर्थविरुद्ध २३ रन खर्चेका थिए ।