काठमाडौं (हाम्रो खेलकु) – चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगिता विजेता टोलीले १० लाख पाउने भएको छ ।

गतवर्ष प्रतियोगिताको विजेता नेपाल पुलिस क्लबले २० लाख रुपैयाँ प्राप्त गरेको थियो । उपविजेता आर्मीले १० लाख रुपैयाँ पाएको थियो । तर मंगलबार बसेको नेपाल क्रिकेट संघ (क्यान) को बोर्ड बैठकले विजेताले १० लाख र उप विजेताले ५ लाख पाउने निर्णय गरेको छ । जुन गतवर्षको भन्दा आधा कम हो । प्रतियोगिताको सेमिफाइनल समिकरण तयार भएपछि मात्र नगद पुरस्कार घोषणा गरेको क्यानले बजेटको अवस्था लगायत प्रतियोगिताबारे पनि कुनै पत्रकार सम्मेलन गरेको छैन ।

त्यस्तै सेमिफाइनलमा पुगेका प्रत्येक टोलीले ५० हजार पाउने छन् । व्यक्तिगत अवार्डमा पनि क्यानले रकम घटाएको छ । प्रतियोगिता प्लेयर अफ द सिरिज घोषित हुने खेलाडीले ५० हजार प्राप्त गर्ने छन् । गतवर्ष प्लेयर अफ द सिरिजलाई आयोजकले एकथान मोटरसाइकल प्रदान गर्ने भनेपनि अन्तिममा ५० हजार नगदमा टारेको थियो । त्यसबेला व्यवस्थापन सम्हालेको नेपालयले राखेपलाई दोष दिँदै पन्छिएको थियो ।

जारी प्रतियोगिता उत्कृष्ट ब्याट्सम्यान र बलरले २५–२५ हजार पाउने भएका छन् । गतवर्ष उत्कृष्ट बलर र ब्याट्सम्यानले ३०–३० हजार पाएका थिए । प्रतियोगिता प्लेयर अफ द म्याचलाई दिँदै आएको २५ सय बढाएर क्यानले सेमिफाइनलदेखि ५ हजार दिने निर्णय गरेको छ ।

त्यस्तै क्यानले राष्ट्रिय टोलीको बन्द प्रशिक्षण आगमी फेब्रुअरी १ देखि काठमाडौंमा गर्ने निर्णय गरेको छ । नेपालले आगमी फ्रेबुअरीमा कतारमा कतार स्पोर्ट्स डे को अवसरमा कतार क्रिकेट एसोसिएसनको आयोजनामा तीन टि२० आई सिरिज खेल्ने भएको छ । उक्त सिरिज फेब्रुअरी ९ देखि १२ सम्म चल्ने छ ।

प्रधानमन्त्री कप क्रिकेट प्रतियोगिता सेमिफाइनल समिकरण पूरा भई सकेको छ । समूह ए बा नेपाल एपिएफ क्लब विजेता र त्रिभुवन आर्मी उपविजेताको रुपमा सेमिफाइनलमा प्रवेश गरेका छन् । समूह बी बाट बागमती प्रदेश विजेता र पुलिस उपविजेताको रुपमा सेमिफाइनलमा पुगेका छन् ।

पहिलो सेमिफाइनलमा बुधबार एपिएफ र पुलिस भिड्ने छन् । बिहिबार दोस्रो सेमिफाइनलमा बागमती प्रदेश र आर्मीबीच प्रतिस्पर्धा हुने छ । फाइनल शनिबार हुनेछ । सेमिफाइनल र फाइनलका खेल टियु मैदानमा हुने छन् ।