काठमाडौं (हाम्रो खेलकुद) – नेपाली राष्ट्रिय क्रिकेट टोलीले फेब्रुअरी दोसो सातामा कतारसँग तीन टि२० आई खेलको सिरिज खेल्ने भएको छ । नेपालले ११ महिनापछि अन्तर्राष्ट्रिय खेल खेल्न लागेको हो ।

नेपालले पछिल्लो पटक मार्चमा थाईल्यान्डमा एसिसी इस्टर्न रिजन टि२० प्रतियोगिता खेलेको थियो । नेपाल क्रिकेट संघ (क्यान) का अनुसार नेपालले फेब्रुअरी ९ मा कतारसँग पहिलो खेल खेल्नेछ । दोस्रो खेलमा नेपालले फेब्रुअरी १० मा खेल्नेछ । तेस्रो तथा अन्तिम खेल फेब्रुअरी १२ मा खेल्नेछ ।

कतार स्पोर्ट्स डे को अवसरमा कतार क्रिकेट एसोसिएसनले गरेका निमन्त्रणालाई स्वीकार गर्दै नेपालले टि२० सिरिज खेल्ने निर्णय लिएको हो । क्यानले राष्ट्रिय टोलीको बन्द प्रशिक्षण आगमी फेब्रुअरी १ देखि काठमाडौंमा सञ्चालन गर्ने निर्णय गरेको छ । नवनियुक्त प्रशिक्षक डेभ ह्वाटमोर पछिल्लो समय प्रधनमन्त्री कपको प्रदर्शन नियाल्दै लगातर मैदानमा रहँदै आएका छन् ।

कतार टि२० वरियतामा २२ औं र नेपाल १५ औं स्थानमा छन् । गतवर्ष सिंगापुरमा भएको आइसिसी टि२० एसिया रिजन छनोटमा कतारले नेपाललाई ४ विकेटले हराएको थियो ।

क्यानले चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगिता विजेता टोलीले १० र उप विजेतालाई ५ लाख दिने निर्णय गरेको छ । सेमिफाइनलमा पुगेका प्रत्येक टोलीले ५० हजार पाउने छन् ।

प्रतियोगिता प्लेयर अफ द सिरिज घोषित हुने खेलाडीले ५० हजार प्राप्त गर्नेछन् । उत्कृष्ट ब्याट्सम्यान र बलरले २५–२५ हजार पाउने भएका छन् । प्रतियोगिता प्लेयर अफ द म्याचलाई दिँदै आएको २५ सय बढाएर क्यानले सेमिफाइनल देखि ५ हजार दिने निर्णय गरेको छ ।