काठमाडौं (हाम्रो खेलकुद) – नेपाल एपिएफ क्लबले काठमाडौं मेयर कप–२०७७ एकदिवसिय क्रिकेट लिगमा नेपाल पुलिस क्लबमाथि १ विकेटको रोमान्चक जित हात पारेको छ ।
आइतबार टियु क्रिकेट मैदानमा जितको लागि २ सय ५९ रनको विजयी लक्ष्य पछ्याएको एपिएफले ४९.५ ओभरमा ९ विकेटको क्षतिमा पूरा गर्यो । एपिएफलाई जितको लागि अन्तिम ओभरमा चार रन चाहिँएको थियो । कप्तान शरद भेषावकरले पाँचौं बलमा तीव्र गतिका बलर राशिद खानलाई छक्का प्रहार गर्दै जित पक्का गरेका थिए । शरद २० रनमा अविजित रहे । सुमित महर्जन ३२ बलमा ३ चौका र १ छक्का सहित ३३ रनमा अविजित रहे ।
सन्दीप जोराले ६५ बलमा २ चौका र ३ छक्का सहित सर्वाधिक ६१ रनको योगदान दिए । राम्रो सुरुवात दिलाउने क्रममा ओपनर तथा विकेटकिपर सुबास खकुरेलले ७९ बलमा ६ चौका सहित ५० रन जोडे । अर्का ओपनर आसिफ शेखले ४८ बलमा ५ चौका र १ छक्का सहित ४२ रन जोडे । पहिलो विकेटका लागि सुबास र आसिफले १३.४ ओभरमा ६७ रनको साझेदारी गर्दै राम्रो सुरुवात दिलाएका थिए । प्रदीप ऐरी ५, कमलसिंह ऐरी १४, अमर सिंह राउटेला ९ र भुवन कार्की ४ रनमा आउट भए ।
पुलिसका स्पिनर पवन सरार्फले ९ ओभरमा ४५ रन खर्चेर ५ विकेट लिएपनि टोलीको हार टार्न सकेनन् । योगेन्द्रसिंह कार्कीले २, दीपेन्द्र सिंह ऐरी र ललित नारायण राजवंशीले १–१ विकेट लिए ।
त्यसअघि टियु क्रिकेट मैदानमा टस जितेर पहिला ब्याटिङ थालेको पुलिसले निर्धारित ५० ओभरमा ७ विकेट गुमाउँदै २ सय ५८ रन बनाएको थियो । दीपेन्द्र सिंह ऐरीले १ सय ३१ बलमा ११ चौका र ६ छक्का सहित १ सय ४० रनको सानदार शतकीय इनिङ खेले पनि टोलीलाई भने जिताउन सकेनन् । हारका बाबजुद पनि दीपेन्द्र खेलमा म्यान अफ द म्याच चुनिए ।
दीपेन्द्रले आफ्नो करिअरको पहिलो शतक अभिनाश बोहरालाई छक्का प्रहार गर्दै १ सय २० पूरा गरेका थिए । पहिलो अर्धशतक ८० बलमा पूरा गरेका दीपेन्द्रले त्यसपछि आफ्नो रनको गति बढाउँदै सानदार शतकीय इनिङ खेले ।
पाँचौं ओभरको अन्तिम बलमा ओपनर कुशल भुर्तेल १० रनमा रन आउट भए । आठौं ओभरको अन्तिम बलमा तीव्र गतिका बलर अमर सिंह राउटेलाले अमित श्रेष्ठलाई १ रनमा सन्दीप जोराबाट क्याच गराए । कप्तान मन्जित श्रेष्ठ ३ रनमा आउट भए ।
कमजोर सुरुवात गरेको पुलिसलाई तेस्रो विकेटका लागि सुनिल धमला र दीपेन्द्रले ५९ रनको साझेदारी गर्दै इनिङ सम्हालेका थिए । धमलालाई २९ औं ओभरको दोस्रो बलमा शरद भेषावकरले ३३ रनमा बोल्ड आउट गरे । धमलाले ७२ बलमा २ चौका प्रहार गरे । पवन सरार्फले ३० बलमा ४ छक्का सहित ३५ रनमा आउट भए । अनिल शाह १८ रनमा आउट भए । एपिएफका कप्तान शरद भेषावकरले १० ओभरमा ४२ रन खर्चेर ३ विकेट लिए । अभिनाश बोहराले २ र अमर सिंह राउटेला १ विकेट लिए ।
पहिलो खेलमा एपिएफले आर्मीलाई १ विकेटले हराएको थियो । पुलिसले बागमती प्रदेशलाई २ रनले हराएको थियो । एपिएफले मंगलबार काठमाडौं मेयर ११ सँग खेल्ने छ । पुलिसले मंगलबार मुलपानीमा आर्मीसँग खेल्ने छ ।
