एजेन्सी – अलराउन्डर फबियन एलेनको अलराउन्ड प्रर्दशनमा श्रीलंकासँगको तीन टि२० आई सिरिज घरेलु टोली वेस्टइन्डिजले जितेको छ । सोमबार विहान तेस्रो टि२० आई खेलमा श्रीलंकालाई ३ विकेटले हराउँदै वेस्टइन्डिजले सिरिज २–१ ले जितेको हो ।

जितको लागि १ सय ३२ रनको विजयी लक्ष्य पछ्याएको वेस्टइन्डिजले १९ ओभरमा ७ विकेट गुमाउँदै पूरा गर्यो । वेस्टइन्डिजका फबियन एलेन ६ बलमा ३ छक्का सहित २१ रनमा अविजित रहे । लेन्डन सिमन्स २६, एभिन लुइस २१, क्रिस गेल १३ र निकोलस पुरन २३ रनमा आउट हुँदा जेसन होल्डर १४ रनमा अविजित रहे । श्रीलंका लक्सान संदकनले ४ ओभरमा २९ रन खर्चेर ३ विकेट दिए । वानिन्दु हसरंगा र दुश्मन्था चामेराले २–२ विकेट लिए ।

त्यसअघि टस जितेर पहिला ब्याटिङ थालेको श्रीलंकाले निर्धारित २० ओभरमा ४ विकेट गुमाउँदै १ सय ३१ रन बनाएको थियो । श्रीलंका मध्यक्रमका ब्याट्सम्यान दीनेश चान्डिमल ४६ बलमा ३ चौका सहित ५४ रनमा अविजित रहे । एशेन बान्डारा ३५ बलमा ३ चौका र २ छक्का सहित ४४ रनमा अविजित रहे । पाँचौ विकेटका लागि चान्डिमल र बान्डाराले ८५ रनको साझेदारी गरेका थिए । वेस्टइन्डिजका फबियन एलेन, केविन सिन्क्लेयर, जेसन होल्डर, आबेद म्याकोयले १–१ विकेट लिए ।

पहिलो खेलमा वेस्टइन्डिज ४ विकेटले विजयी भएको थियो । दोस्रो खेलमा श्रीलंका ४३ रनले विजयी भएको थियो । श्रीलंका र वेस्टइन्डिजबीच थप तीन ओडिआई र दुई टेष्ट सिरिज हुने छ । पहिलो ओडिआई बुधबार हुने छ ।