काठमाडौं (हाम्रो खेलकुद) – काठमाडौं मेयर कप २०७७ एकदिवसिय क्रिकेट लिगमा काठमाडौं मेयर–११ ले विभागीय टोली त्रिभुवन आर्मी क्लबविरुद्ध मध्यम सुरुवात गरेको छ ।

टियु क्रिकेट मैदानमा टस हारेर ब्याटिङ गरि रहेको सन्दीप लामिछाने कप्तान रहेको मेयर–११ ले २५ ओभरमा ४ विकेट गुमाउँदै १ सय ११ रन बनाएको छ । मेयर–११ का सौरभ खनाल ३३ र सन्दीप रजाली १७ रनमा अविजित छन् । सौरभले ३७ बलमा २ चौका र २ छक्का प्रहार गरेका छन् । पाँचौं विकेटका लागि सौरभ र सन्दीपले ४६ रनको अविजित साझेदारी गरि सकेका छन् ।

मेयर ११ लाई युवा ओपनर हरि शंकर शाह र खडक बहादुर बोहराले १०.२ ओभरमा ४८ रनको साझेदारी गर्दै राम्रो सुरुवात दिलाएका थिए । तर स्पिनर साहब आलमले त्यसपछि भने लगातार विकेट लिदै मेयर–११ को इनिङ धरासयी बनाए ।

साहबले ११ औं ओभरको दोस्रो बलमा कप्तान तथा विकेटकिपर विनोद भण्डारीबाट शाहलाई १८ रनमा क्याच गराउँदै पहिलो सफलता दिलाए । शाहले २९ बलमा ४ चौका प्रहार गरे ।

१३ औं ओभरको चौथो बलमा आलमले अर्का ओपनर खडकलाई १९ रनमा बोल्ड गरे । खडकले ४६ बलमा ३ चौका प्रहार गरे । युवा विकेटकिपर विपिन रावल ६ रनमा हिट विकेटका रुपमा पेभिलिएन फर्के । साहबले १५ औं ओभरको चौथो बलमा शून्यमा एलबिडब्लू आउट गर्दै ६५–४ को कमजोर अवस्थामा पुर्याएका थिए ।