काठमाडौं (हाम्रो खेलकुद) – स्पिनर साहब आलम र तीव्र गतिका बलर जितेन्द्र मुखियाको उत्कृष्ट बलिङको सहयोगमा काठमाडौं मेयर कप-२०७७ एकदिवसिय क्रिकेट लिगमा काठमाडौं मेयर–११ ले विभागीय टोली त्रिभुवन आर्मी क्लबलाई १ सय ५६ रनको सामान्य लक्ष्य दिएको छ ।

टियु क्रिकेट मैदानमा टस हारेर ब्याटिङ गरेको मेयर–११ को टिम ४२.१ ओभरमा १ सय ५५ रनमा अल आउट भयो । मेयर-११ का पाँच खेलाडीले खाता खोल्न सकेनन् ।

मेयर–११ का सौरभ खनालले ७४ बलमा २ चौका र २ छक्का सहित सर्वाधिक ४२ रनको योगदान दिए । सन्दीप रजालीले ६३ बलमा ३ चौका सहित ३७ रन बनाए । एक समय ६५–४ को कमजोर अवस्थामा पुगेको मेयर–११ लाई पाँचौं विकेटका लागि सौरभ खनाल र सन्दीप रजालीले ६६ रनको साझेदारी गर्दै इनिङ सम्हालेका थिए । तर त्यसपछिका ब्याट्सम्यानले साझेदारी गर्न नसक्दा बलियो योगफल बनाउन सकेन ।

मेयर-११ लाई युवा ओपनर हरि शंकर शाह र खडक बहादुर बोहराले १०.२ ओभरमा ४८ रनको साझेदारी गर्दै राम्रो सुरुवात दिलाएका थिए । तर स्पिनर साहब आलमले त्यसपछि भने लगातार विकेट लिदै मेयर–११ को इनिङ धरासयी बनाए ।

साहबले ११ औं ओभरको दोस्रो बलमा कप्तान तथा विकेटकिपर विनोद भण्डारीबाट शाहलाई १८ रनमा क्याच गराउँदै पहिलो सफलता दिलाए । शाहले २९ बलमा ४ चौका प्रहार गरे ।
१३ औं ओभरको चौथो बलमा आलमले अर्का ओपनर खडकलाई १९ रनमा बोल्ड गरे । खडकले ४६ बलमा ३ चौका प्रहार गरे । युवा विकेटकिपर विपिन रावल ६ रनमा हिट विकेटका रुपमा पेभिलिएन फर्के । साहबले १५ औं ओभरको चौथो बलमा शून्यमा एलबिडब्लू आउट गदा ६५–४ को कमजोर अवस्थामा पुगेको थियो ।

तल्लोक्रमका कृष्ण कार्की, विपिन खत्री र नारायण जोशीले खाता खोल्न सकेनन् । सन्दीप लामिछानेले १८ बलमा २ चौका सहित १३ रनको योगदान दिए ।

आर्मीका स्पिनर साहब आलमले १० ओभरमा १ मेडन सहित ३९ रन खर्चेर ४ विकेट लिए । तीव्र गतिका बलर जितेन्द्र मुखियाले १० ओभरमा ३ मेडन सहित ३८ रन खर्चेर ३ विकेट लिए । विक्रम सोब, कुशल मल्ल र सोमपाल कामीले १–१ विकेट लिए ।