काठमाडौं (हाम्रो खेलकुद) – तीव्र गतिका बलर नन्दन यादवको उत्कृष्ट ब्याटिङको सहयोगमा बागमती प्रदेशले काठमाडौं मेयर कप–२०७७ एकदिवसिय क्रिकेट लिगमा नेपाल एपिएफ क्लबलाई २ सय ३४ रनको प्रतिस्पर्धात्मक लक्ष्य दिएको छ ।

टियु क्रिकेट मैदानमा टस हारेर पहिला ब्याटिङ थालेको बागमतीले निर्धारित ५० ओभरमा ६ विकेट गुमाउँदै २ सय ३३ रन बनायो ।

तल्लोक्रममा ब्याटिङ गरेका नन्दन यादव ५६ बलमा ७ चौका र २ छक्का सहित ६० रनमा अविजित रहे । छैटौं विकेटका लागि नन्दन यादव र आदिल खानले ७३ रनको महत्वपूर्ण साझेदारी गरेका थिए । आदिल ४४ बलमा ४ चौका सहित ३४ रनमा क्याच आउट भए ।

बागमतीका कप्तान ज्ञानेन्द्र मल्लले ८४ बलमा ७ चौका सहित ५७ रनमा आउट भए । ओपनर आकाश थपालाई सातौं ओभरको दोस्रो बलमा अभिनाश बोहराले विकेटकिपर आसिफ सेखले १ रनमा क्याच आउट गराएका थिए । पारस खड्कालाई १७ औं ओभरको तेस्रो बलमा अनुभवी स्पिनर वसन्त रेग्मीले २९ रनमा भुवन कार्कीबाट क्याच आउट गराए । पारसले ३७ बलमा २ चौका र १ छक्का प्रहार गरे ।

२८ औं ओभरको पहिलो बलमा ज्ञानेन्द्रलाई अमर सिंह राउटेलाले किशोर महतोबाट क्याच गराए । अमरले पृथु बास्कोटालाई ५ रनमा क्याच आउट गराए । ३५ औं ओभरको अन्तिम बलमा ईशान पाण्डेलाई किशोर महतोले शंकर रानाबाट ३१ रनमा क्याच आउट गराए । इशानले ४२ बलमा ३ चौका प्रहार गरे ।

एपिएफका अमर सिंह राउटेला र किशोर महतो २–२ विकेट लिए । वसन्त रेग्मी र अभिनाश बोहराले १–१ विकेट लिए ।