काठमाडौं (हाम्रो खेलकुद) – लेगस्पिनर सोनु देवकोटाको घातक बलिङमा विभागीय टोली नेपाल एपिएफ क्लब काठमाडौं मेयर कप–२०७७ एकदिवसिय क्रिकेट लिग बागमती प्रदेशसँग २७ रनले पराजित भएको छ ।

जितको लागि २ सय ३४ रनको विजयी लक्ष्य पछ्याएको एपिएफ ४४.५ ओभरमा २ सय ६ रनमा अल आउट भयो । एपिएफका ओपनर आसिफ शेखले ३८ बलमा ७ चौका र २ छक्का सहित सर्वाधिक ५० रनको योगदान दिए ।

तीव्र गतिका बलर रामनरेश गिरीले तेस्रो ओभरको पहिलो बलमा ओपनर तथा कप्तान शरद भेषावकरलाई ४ रनमा गौतम केसीबाट क्याच गराउँदै पहिलो सफलता दिलाएका थिए । तर दोस्रो विकेटका लागि शंकर राना र आसिफ शेखले ७२ रनको साझेदारी गर्दै उत्कृष्ट सुरुवात दिलाएका थिए । १६ औं ओभरको दोस्रो बलमा आसिफलाई लेगस्पिनर सोनु देवकोटाले पारस खड्काबाट क्याच गराएपछि एपिएफले त्यसपछि लगातार विकेट गुमाएको थियो ।

सोनुले भुवन कार्कीलाई १४ रनमा बोल्ड आउट गरे । २० औं ओभरको चौथो बलमा शंकरलाई सोनुले ज्ञानेन्द्र मल्लबाट २९ रनमा क्याच गराउँदै बागमतीलाई खेलमा फर्काएका थिए । शंकरले ५८ बलमा ३ चौका प्रहार गरे । सोनुले सुमित महर्जनलाई ४ रनमा पारस खड्काबाट क्याच आउट गराए । २८ औं ओभरको चौथो बलमा सोनुलेनै सन्दीप जोरालाई २५ रनमा बोल्ड आउट गर्दै आफ्नो पाँच विकेट पूरा गरेका थिए । जोराले २३ बलमा २ चौका प्रहार गरे ।

सोनुले बसन्त रेग्मीलाई ३२ औं ओभरको पाँचौं बलमा ११ रनमा एलबिडब्लू आउट गर्दै ब्यक्तिगत ६ विकेट हात पारे । अमर सिंह राउटेला २७, प्रदीप ऐरी ८ र किशोर महतो ११ रनमा आउट भए ।
सोनु देवकोटाले १० ओभरमा ४१ रन खर्चेर ६ विकेट लिए । अरियो पौडेल र रामनरेश गिरीले २–२ विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङ थालेको बागमतीले निर्धारित ५० ओभरमा ६ विकेट गुमाउँदै २ सय ३३ रन बनाएको थियो ।

तल्लोक्रममा ब्याटिङ गरेका नन्दन यादव ५६ बलमा ७ चौका र २ छक्का सहित ६० रनमा अविजित रहे । छैटौं विकेटका लागि नन्दन यादव र आदिल खानले ७३ रनको महत्वपूर्ण साझेदारी गरेका थिए । आदिल ४४ बलमा ४ चौका सहित ३४ रनमा क्याच आउट भए ।

बागमतीका कप्तान ज्ञानेन्द्र मल्लले ८४ बलमा ७ चौका सहित ५७ रनमा आउट भए । ओपनर आकाश थपालाई सातौं ओभरको दोस्रो बलमा अभिनाश बोहराले विकेटकिपर आसिफ सेखले १ रनमा क्याच आउट गराएका थिए । पारस खड्कालाई १७ औं ओभरको तेस्रो बलमा अनुभवी स्पिनर वसन्त रेग्मीले २९ रनमा भुवन कार्कीबाट क्याच आउट गराए । पारसले ३७ बलमा २ चौका र १ छक्का प्रहार गरे ।

२८ औं ओभरको पहिलो बलमा ज्ञानेन्द्रलाई अमर सिंह राउटेलाले किशोर महतोबाट क्याच गराए । अमरले पृथु बास्कोटालाई ५ रनमा क्याच आउट गराए । ३५ औं ओभरको अन्तिम बलमा ईशान पाण्डेलाई किशोर महतोले शंकर रानाबाट ३१ रनमा क्याच आउट गराए । इशानले ४२ बलमा ३ चौका प्रहार गरे ।

एपिएफका अमर सिंह राउटेला र किशोर महतो २–२ विकेट लिए । वसन्त रेग्मी र अभिनाश बोहराले १–१ विकेट लिए ।