एजेन्सी – ओपनर साई होपको शतकको सहयोगमा वेस्टइन्डिजले श्रीलंकासँगको पहिलो ओडिआई खेलमा ८ विकेटको सानदार जित हात पारेको छ । यो जितसँगै तीन ओडिआई सिरिजमा घरेलु टोली वेस्टइन्डिजले १–० को अग्रता लिएको छ । जितको लागि २ सय ३३ रनको विजयी लक्ष्य पछ्याएको वेस्टइन्डिजले ४७ ओभरमा २ विकेट गुमाउँदै पूरा गर्यो ।

ओपनर साई होपले १ सय १० रनको शतकीय इनिङ खेले । ओडिआई करिअरको १० औं शतक प्रहार गरेका होपले १ सय ३३ बलमा १२ चौका र १ छक्का प्रहार गरे । होपलाई दुश्मन्था चमेराले बोल्ड आउट गरे । एभिन लुइस ९० बलमा ४ चौका र २ छक्का सहित ६५ रनमा आउट भए । पहिलो विकेटका लागि एभिन लुइस र साई होपले २८.२ ओभरमा १ सय ४३ रनको उत्कृष्ट साझेदारी गर्दै सहज जित दिलाएका थिए । डरेन व्राभो ३७ र जेसन मोहम्मद १३ रनमा अविजित रहे । दुश्मन्था चमेराले २ विकेट लिए ।

त्यसअघि सर भिभियन रिचर्ड्स स्टेडियम अन्टिगुआमा टस जितेर पहिले ब्याटिङ थालेको श्रीलंका ४९ ओभरमा २ सय ३२ रनमा अल आउट भएको थियो । श्रीलंका ओपनर दनुष्का गुणथिलका र कप्तान दिमुथ करुणारत्नेले १९.२ ओभरमा १ सय ५ रनको साझेदारी गर्दै राम्रो सुरुवात दिलाएपनि त्यसपछिका ब्याट्सम्यान चल्न नसक्दा मध्यम योगफलमै समेटिएको थियो । दनुष्का ६१ बलमा ७ चौका सहित ५५ रनमा आउट भए । कप्तान करुणारत्ने ६१ बलमा ४चौका सहित ५२ रनमा आउट भए ।

तल्लोक्रमका ऐशन बान्डारा ६० बलमा ४ चौका सहित ५० रन बनाए । अन्य ब्याट्सम्यानले राम्रो प्रर्दशन गर्न सकेनन् । वेस्टइन्डिजका जेसन मोहम्मद र जेसन होल्डरले २–२ विकेट लिए । अल्जारी जोसेफ, काइरन पोलार्ड र फबियन एलेनको नाममा १–१ विकेट रह्यो । दोस्रो खेल शुक्रबार हुने छ ।