काठमाडौं (हाम्रो खेलकुद) – काठमाडौं मेयर कप–२०७७ एकदिवसिय क्रिकेट लिगको उपाधि जित्ने लक्ष्य रहेको नेपाल एपिएफ क्लबका कप्तान शरद भेषावकर र नेपाल पुलिस क्लबका कप्तान मन्जित श्रेष्ठले बताएका छन् ।

शुक्रबार टियु क्रिकेट मैदानमा फाइनल अघि बोल्दै दुवै कप्तानले उपाधि जित्ने लक्ष्य रहेको बताएका छन् । एपिएफका कप्तान शरद भेषावकरले टोली राम्रो लयमा रहेको र उपाधि जित्न सबै खेलाडी उत्साहित पनि रहेको बताए । शरदले लिग खेलमा पुलिसलाई हराएपनि कमजोर भने नरहेको बताए । सबैको प्रर्दशनले राम्रो प्रर्दशनका साथ फाइनलमा आएको हुँदा टोलीको आत्माविश्वास पनि उच्च रहेको बताए ।

नेपाल पुलिसका कप्तान मन्जित श्रेष्ठले तयारी राम्रो भएको हुँदा उपाधि जित्नेमा आत्माविश्वासी रहेको बताए । एपिएफ राम्रो टोली हुँदा योजनाका साथ खेल्ने बताए । मन्जितले फाइनलमा राम्रो खेल्दै उपाधि जित्ने बताए ।

पाँच टोली सहभागी प्रतियोगितामा एपिएफ र पुलिस लिगमा शीर्ष दुई स्थानमा रहँदै फाइनलमा स्थान बनाएका हुन् । फाइनल शनिबार टियु क्रिकेट मैदानमा हुने छ । पुलिस ४ खेलमा ३ मा जित र १ मा हार सहित शीर्ष स्थानमा रहँदै फाइनलमा स्थान बनायो । पुलिसले पहिलो खेलमा बागमती प्रदेशलाई २ रनले हराएको थियो । दोस्रो खेलमा एपिएफसँग १ विकेटले पराजित भएको थियो । तेस्रो खेलमा आर्मीलाई ३ विकेट र अन्तिम खेलमा काठमाडौं मेयर–११ लाई १ सय ३ रनले हराएको थियो ।

एपिएफले पहिलो खेलमा आर्मी र दोस्रोमा पुलिसलाई समान १–१ विकेटले पराजित गरेको थियो । तेस्रो खेलमा बागमती प्रदेशसँग २७ रनले पराजित हुँदा अन्तिम खेलमा मेयर–११ लाई ७ विकेटले हराउँदै फाइनलमा स्थान बनाएको थियो ।

मेयर कप–२०७७ को विजेताले पाँच लाख रुपैयाँ पाउने छ । उप विजेताले ३ लाख रुपैयाँ प्राप्त गर्ने छ । प्रतियोगिता सर्वोत्कृष्ट खेलाडीले ५० हजार पाउनेछन् । प्रतियोगिता सर्वोत्कृष्ट ब्याट्सम्यान र बलरले २५-२५ हजार पाउने छन् ।