काठमाडौं (हाम्रो खेलकुद) – काठमाडौं मेयर कप–२०७७ एकदिवसिय क्रिकेट लिगको फाइनलमा आज दुई विभागीय टोली नेपाल पुलिस क्लब र नेपाल एपिएफ क्लबबीच प्रतिस्पर्धा हुँदै छ । खेल बिहान ९:३० मा टियु मैदानमा सुरु हुने छ ।

पुलिस लिगमा शीर्ष र एपिएफ दोस्रो हुँदै फाइनल खेल्न लागेका हुन् । एक महिना अघि सम्पन्न प्रधानमन्त्री कप राष्ट्रिय एकदिवसिय क्रिकेट प्रतियोगितामा आर्मीसँग फाइनलमा पराजित भएको एपिएफ त्यो गल्तीबाट पाठ सिक्दै च्याम्पियन बन्न चाहन्छ । एपिएफको शरद भेषावकरले कप्तानी गर्ने छन् । नेपाली घरेलु क्रिकेटका सफल कप्तान मानिने शरद भेषावकरको नेतृत्वमा रहेको एपिएफले यस प्रतियोगिता लिग खेलमा पुलिसलाई १ विकेटले हराएको थियो । पुलिसले प्रस्तुत गरेको २ सय ५९ रनको विजयी लक्ष्य एपिएफले ९ विकेटको क्षतिमा १ बल अगाडि पूरा गरेको थियो । उक्त खेलमा पुलिसका दीपेन्द्रसिंह ऐरी १ सय ४० रनको शतकीय इनिङ खेर गएको थियो ।

एपिएफले जितेका तीनै खेल लक्ष्य पछ्याउँदा छ । आर्मीले प्रस्तुत गरेको २ सय ३६ रनको विजयी लक्ष्य एपिएफले २ बल अगाडि ९ विकेट गुमाउँदै पूरा गरेको थियो । एपिएफका आसिफ शेख, सन्दीप जोरा र अमरसिंह राउटेलाले यस प्रतियोगितामा निरन्तर राम्रो प्रर्दशन गरि रहेका छन् । राम्रो सुरुवात दिलाएपनि ठूलो इनिङमा बदल्न भने सकेका छैनन् ।

जुन फाइनलमा आवश्यक देखिन्छ । कप्तान शरद भेषावकरलाई ठूलो इनिङ खेल्न आवश्यक देखिन्छ । तीव्र गतिका बलरमा अभिनाश बोहरा र कमलसिंह ऐरी पुलिसलाई घातक बन्न सक्छन् । स्पिनरमा वसन्त रेग्मी र भुवन कार्कीको प्रर्दशन निकै महत्वपूर्ण हुन्छ । ओपनर प्रदीप ऐरी र सुबास खकुरेल चोटका कारण खेल्ने सम्भावना कम छ ।

यता पुलिसले अपेक्षा अनुसार प्रर्दशन गर्न सकेको छैन । शीर्षक्रमका ब्याट्सम्यान सुनिल धमला, कुशल भुर्तेल र अनिल कुमार शाहलाई ठूलो इनिङ र राम्रो सुरुवात दिन आवश्यक देखिन्छ । यस प्रतियोगितामा ब्याटिङ र बलिङ दुबैमा उच्च प्रर्दशन गरि रहेका दीपेन्द्र सिंह ऐरी र पवन सरार्फको प्रर्दशन पुलिसको लागि निकै महत्वपूर्ण हुने छ । तुलनात्मक रुपमा कमजोर तीव्र गतिका बलर रहेको पुलिसका स्पिनर सागर ढकाल र ललित नारायण राजवंशी एपिएफलाई घातक बन्न सक्छन् । तीव्र गतिका प्रमुख बलरमा गुलसन झा र राशिद खान छन् । यी दुई मध्य एकले मौका पाउने छन् । राशिद नेपालबाट खेल्दा गुलशनले यस प्रतियोगितामा मेयर–११ विरुद्ध खेलेका थिए । गुलशनमा अनुभवको कम हुँदा राशिदले मौका पाउने सम्भावना बढी छ । दबाबमा अनुभवी खेलाडीलाई खेल्न सहज हुन्छ ।

पुलिस ४ खेलमा ३ मा जित र १ मा हार सहित शीर्ष स्थानमा रहँदै फाइनलमा स्थान बनायो । पुलिसले पहिलो खेलमा बागमती प्रदेशलाई २ रनले हराएको थियो । दोस्रो खेलमा एपिएफसँग १ विकेटले पराजित भएको थियो । तेस्रो खेलमा आर्मीलाई ३ विकेट र अन्तिम खेलमा काठमाडौं मेयर–११ लाई १ सय ३ रनले हराएको थियो ।

एपिएफले पहिलो खेलमा आर्मी र दोस्रोमा पुलिसलाई समान १–१ विकेटले पराजित गरेको थियो । तेस्रो खेलमा बागमती प्रदेशसँग २७ रनले पराजित हुँदा अन्तिम खेलमा मेयर–११ लाई ७ विकेटले हराउँदै फाइनलमा स्थान बनाएको थियो ।

मेयर कप–२०७७ को विजेताले पाँच लाख रुपैयाँ पाउने छ । उप विजेताले ३ लाख रुपैयाँ प्राप्त गर्ने छ । प्रतियोगिता सर्वोत्कृष्ट खेलाडीले ५० हजार पाउनेछन् । प्रतियोगिता सर्वोत्कृष्ट ब्याट्सम्यान र बलरले २५-२५ हजार पाउने छन् ।