एजेन्सी – ओपनर एभिन लुईसको शतकमा वेस्टइन्डिजले श्रीलंकाविरुद्ध तीन ओडिआई सिरिज एक खेल अगावै २–० ले जितेको छ । दोस्रो ओडिआई खेलमा वेस्टइन्डिजले श्रीलंकालाई ५ विकेटले हराउँदै सिरिज एक खेल अगावै जितेको हो ।

जितको लागि २ सय ७४ रनको विजयी लक्ष्य पछ्याएको वेस्टइन्डिजले ४९.४ ओभरमा ५ विकेटको क्षतिमा पूरा गर्यो । एभिन लुइस १ सय २१ बलमा ८ चौका र ४ छक्का सहित १ सय ३ रनमा आउट भए । लुइसको यो ओडिआई करिअरको चौथो औं शतक हो । अर्का ओपनर साई होप १ सय ८ बलमा ६ चौका सहित ८४ रनमा आउट भए ।

पहिलो विकेटका लागि लुइस र होपले ३७.२ ओभरमा १ सय ९२ रनको साझेदारी गरेका थिए । निकोलस पुरन ३५, ड्रेन व्राभो १०, काइरन पोलार्ड र फबियन एलेन १५–१५ रन बनाए । श्रीलंका थिसेरा परेरा र नुवान प्रदीपले २–२ विकेट लिए ।

त्यसअघि टस हारेर पहिला ब्याटिङ थालेको श्रीलंकाले ५० ओभरमा ८ विकेट गुमाउँदै २ सय ७३ रन बनाएको थियो । श्रीलंका ओपनर दनुष्का गुणथिलाका ९६ बलमा १० चौका र ३ छक्का सहित ९६ रनमा आउट भए । जेसन मोहम्मदले बोल्ड आउट गरेपछि उनी शतक बनाउन चार रनले चुकेका थिए ।

विकेटकिपर दीनेश चान्डिमल ९८ बलमा ३ चौका र २ छक्का सहित ७१ रनमा आउट भए । वानिन्दु हसरंगा ३१ बलमा २ चौका र ४ छक्का सहित ४७ रनमा आउट भए । वेस्टइन्डिजका जेसन मोहम्मदले १० ओभरमा ४७ रन खर्चेर ३ विकेट लिए । अल्जारी जोशेफले २, जेसन होल्डर र अकील होसनले १–१ विकेट लिए ।

पहिलो खेलमा वेस्टन्डिज ८ विकेटले विजयी भएको थियो । तेस्रो ओडिआई खेल आइतबार हुने छ ।