एजेन्सी – युवा ओपनर पृथ्वी शाले भारतीय क्रिकेट टोलीबाट बाहिर (ड्रप) भएपछि घरेलु क्रिकेटमा कीर्तिमानी प्रर्दशनका साथ पूनरागमनको संकेत दिएका छन् ।

गत डिसेम्बरमा अष्ट्रेलिया भ्रमणमा शाले पहिलो टेष्टमा खराब प्रर्दशन गर्दै शून्य र ४ रनमा आउट भएपछि भारतले उनलाई टोली बाहिर राखेको थियो । उनको स्थान लिएका अर्का युवा ब्याट्सम्यान सुभमन गिलले उच्च प्रर्दशन गरेपछि शा भारतीय टोली बाहिर रहेका थिए । इंग्ल्यान्ड भ्रमणमा शालाई भारतले टोलीमा राखेन ।

यता २१ वर्षिय पृथ्वीले भारतको ५० ओभरको सर्वाधिक ठूलो र लोकप्रिय राष्ट्रिय प्रतियोगिता विजय हजारे ट्रफीमा कीर्तिमानी प्रर्दशन गरेका छन् । कप्तान पृथ्वीले आफ्नो उच्च प्रर्दशनमा फाइनलमा उत्तर प्रदेशलाई ६ विकेटले हराउँदै आइतबार मुम्बईलाई च्याम्पियन बनाएका थिए । सन् २०१८ मा भारतीय यू१९ टोलीलाई विश्वकप च्याम्पियन बनाएका शाले २१ वर्षकै उमेरमा राष्ट्रिय प्रतियोगिता पनि उपाधि दिलाएका हुन् ।

पृथ्वी एक संस्करणको विजय हजारे ट्रफी इतिहासकै सर्वाधिक रन बनाउने खेलाडी बनेका छन् । उनले ८ खेलमा ८ सय २७ रन बनाउँदै यस कीर्तिमान कायम गरेका हुन् । विजय हजारेको इतिहासमा एकै संस्करणमा एक ब्याट्सम्यानले पहिलो पटक ८ सय भन्दा माथि बनाएका हुन् ।

यसअघि यस प्रतियोगितामा सर्वाधिक रन बनाउने कीर्तिमान कर्नाटका ओपनर देभदत्त पाडिक्कलको नाममा थियो । उनले एकै संस्करणमा ७ सय ३७ रन बनाएका थिए ।

मुम्बईबाट पुडुचेरीवरुद्ध दोहोरो शतकका साथ कीर्तिमान बनाएका थिए । पृथ्वी शा ले १ सय ५२ बलमा ३१ चौका र ५ छक्का सहित २ सय २७ रनको अविजित दोहोरो शतकीय इनिङ खेले । जुन विजय हजारे ट्रफी इतिहासै सर्वाधिक उच्च व्यक्तिगत स्कोर हो ।