काठमाडौं (हाम्रो खेलकुद) – उपाधिको बलियो दाबेदार विभागीय टोली नेपाल एपिएफ क्लबले ललितपुर मेयर महिला च्याम्पियनसिप–२०७७ प्रतियोगिताको लागि दुई परिवर्तन गर्दै १४ सदस्य टोली घोषणा गरेको छ ।

एपिएफले राष्ट्रिय टोलीकी उपकप्तान सीता राना मगरको कप्तानीमा १४ सदस्य टोली घोषणा गरेको हो । राष्ट्रिय टोलीका खेलाडीको बाहुल्यता भएको एपिएफ नेपाली महिला घरेलु क्रिकेटमा सर्वाधिक बलियो टोली हो । गत पुसमा लमहीमा सम्पन्न प्रधानमन्त्री कप महिला राष्ट्रिय प्रतियोगिता फाइनलमा एपिएफ प्रदेश १ सँग ६ रनले पराजित हुन पुगेको थियो । यस प्रतियोगितामा प्रधानमन्त्री कपको सेमिफाइनलमा पुगेका प्रदेश १, एपिएफ, लुम्बिनी र सुदूरपश्चिमसँगै ललितपुर ११ गरि पाँच टोली छन् । प्रतियोगिता लिगको आधारमा हुने छ ।

एपिएफको टोलीमा दुई परिवर्तन गरेको छ । प्रधानमन्त्री कप खेलेका तीव्र गतिकी बलर ईश्वरी विष्ट र प्यारी चौधरीको स्थानमा बिनु बुढामगर र सन्जु लामालाई समेट्दै टोली घोषणा गरेको जनाएको छ । एपिएफले उद्धघाटन खेलमा चैत २१ मा प्रदेशको सर्वाधिक बलियो टोली प्रदेश १ सँग खेल्ने छ । चैत २२ मा सुदूरपश्चिम, चैत २५ मा ललितपुर ११ र चैत २६ मा लुम्बिनी प्रदेशसँग खेल्ने कार्यक्रम छ । फाइनल फागुन २८ मा हुने छ । लिगपछि शीर्ष दुई टोली फाइनलमा उपाधिका लागि भिड्ने छन् ।

एपिएफ टोली : सीता रानामगर (कप्तान), बिनु बुढामगर, ज्योती पान्डे, ईन्दु बर्मा, सरिता मगर, करुणा भण्डारी, सोनु खड्का, रेखा रावल, सुष्मा श्रेष्ठ, खिना कुमारी थापा, सन्जु लामा, सुमन बिष्ट, ममता चौधरी, राजमती ऐरी ।

प्रशिक्षक : राजेश श्रेष्ठ

ब्यवस्थापक : पन्कज चन्द