काठमाडौं (हाम्रो खेलकुद) – ललितपुर महानगरपालिका आर्थिक सहयोगमा नेपाल क्रिकेट संघ (क्यान) ले शनिबारदेखि आयोजना गर्ने ललितपुर मेयर महिला च्याम्पियनसिप–२०७७ टि२० क्रिकेट प्रतियोगिता सम्पूर्ण तयारी पूरा भएको छ ।

प्रतियोगितामा पाँच टोलीको सहभागीता छ । क्यानले गत पुषमा लमहीको दाङमा सम्पन्न प्रधानमन्त्री कप महिला टि२० क्रिकेट प्रतियोगितामा सेमिफाइनलमा पुगेका प्रदेश १, नेपाल एपिएफ क्लब, सुदूरपश्चिम, लुम्बिनीसँगै अन्य प्रदेशबाट ललितपुर मेयर ११ गरि पाँच टोली छन् ।

प्रधानमन्त्री कपमा समूह चरणबाटै बाहिरिएका प्रदेश २, बागमती, गण्डकी र कर्णालीको टोलीबाट राम्रो प्रदर्शन गर्ने खेलाडीबाट १४ सदस्य टोली घोषणा गरेको छ । पाँचै टोलीले आफ्नो टोली घोषणा गरि सकेका छन् । प्रतियोगिता लिगको आधारमा हुने छ । लिगपछि शीर्ष दुईमा रहने टोलीले फाइनलमा स्थान बनाउने छन् ।

चैत २१ देखि २८ सम्म टियु मैदानमा हुने प्रतियोगिताको सम्पूर्ण प्रत्यक्ष प्रसारण एक्सन स्पोटर््सले गर्ने छ । विजेताले ३ लाख र उप विजेताले १ लाख ५० हजार प्राप्त गर्ने छन् । प्रतियोगिता सर्वोत्कृष्ट खेलाडीले २५ हजार, उत्कृष्ट ब्याटर र बलरले समान १५–१५ हजार प्राप्त गर्ने छन् ।

हरेक खेलको ‘प्लेयर अफ द म्याच’ ले ३ हजार प्राप्त गर्ने छन् ।क्यानले विद्यार्थीको रु २५ र अन्यलाई ५० रुपैयाँ टिकट मूल्य तोकेको छ । क्यानका म्यानेजर विनोद दासले पछिल्लो समय बढ्दो कोरोना कारण समर्थकलाई अनुमति दिने वा नदिने अन्यौल रहेको जानकारी दिए ।

खेलहरु विहान ९ बजे र दिउँसो १ बजेबाट सुरु हुने छ । ललितपुरले क्यानलाई यस प्रतियोगिताको लागि २० लाख रुपैयाँ आर्थिक सहयोग गरेको छ । उद्धघाटन खेलमा एपिएफ र प्रदेश १ भिड्ने छन् । राष्ट्रिय महिला क्रिकेट टोलीको खेलाडीको बाहुल्यता भएको एपिएफ र प्रदेश १ कागजी रुपमा यस प्रतियोगिता उपाधिको सर्वाधिक बलियो दाबेदार टोली हुन् ।

प्रधानमन्त्री महिला कपको फाइनलमा विभागीय टोली एपिएफलाई ६ रनले हराउँदै प्रदेश नम्बर एक इतिहासमा पहिलो पटक राष्ट्रिय च्याम्पियन बनेको थियो ।