काठमाडौं (हाम्रो खेलकुद) – अनुभवी स्पिनर बिुन बुढामगरको घातक बलिङसँगै ललितपुर मेयर वुमन्स च्याम्पियनसिप–२०७७ टि२० क्रिकेट प्रतियोगिता छैटौं खेलमा ललितपुर मेयर्स-११ ले नेपाल एपिएफ क्लबलाई ६७ रनको सामान्य लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ रोजेको ललितपुरले २० ओभरमा ९ विकेट गुमाउँदै ६६ रन बनायो । ललितपुरका ८ खेलाडीले दोहोरो अंकमा रन बनाउन सकेनन् । ललितपुरकी युवा ब्याटर तथा विकेटकिपर कञ्चन श्रेष्ठले सर्वाधिक १७ रन बनाइन् । अन्य ब्याटरले राम्रो प्रदर्शन गर्न सकेनन् । स्पिनर बिनु बुढामगरले मध्यक्रममा उत्कृष्ट बलिङका साथ धरासय बनाएकी थिइन् । कञ्चनले ३० बलमा २ चौका प्रहार गरिन् । सन्तोषी चौधरी १९ बलमा २ चौका सहित १३ रनमा अविजित रहिन् ।

दोस्रो ओभरको चौथो बलमा सुमन विष्टले ओपनर अनुराधा चौधरीलाई ममता चौधरीबाट ९ रनमा क्याच गराउँदै पहिलो सफलता दिलाएकी थिइन् । तेस्रो ओभरको पहिलो बलमा रेखा रावलले विन्दा कटुवाललाई १ रनमा बोल्ड आउट गरिन् । तेस्रो विकेटका लागि कप्तान सरस्वती चौधरी र कञ्चनले ३० रनको साझेदारी गर्दै इनिङ सम्हाल्न खोजेका थिए । नवौं ओभरको पाँचौं बलमा स्पिनर बिनु बुढामगरले सरस्वतीलाई १२ रनमा कट एण्ड बोल्ड आउट गर्दै पेभिलिएन फर्काएपछि ललितपुरले एकपछि अर्को लगातार विकेट गुमाएको थियो ।

बिनुले सुमन खतिवडालाई ३ रनमा बोल्ड आउट गरेपछि ललितपुरको बलियो योगफलको सम्भावना टाढिएको थियो । बिनुले कन्चन र अस्मिना कर्माचार्य २ रनमा आउट गरेपछि ललितपुर ५०–७ को खराब अवस्थामा पुगेको थियो ।

एपिएपकी अनुभवी स्पिनर बिनु बुढामगरले ४ ओभरमा ११ रन खर्चेर ४ विकेट लिइन् । रेखा रावलले ४ ओभरमा १ मेडन सहित २१ रन खर्चेर २ विकेट लिइन् । सुमन विष्ट, करुणा भण्डारी र सीता रानामगरले १–१ विकेट लिए ।