काठमाडौं (हाम्रो खेलकुद) – सुदूरपश्चिम प्रदेश लुम्बिनी प्रदेशमाथि ८ विकेटको सानदार जितसँगै ललितपुर मेयर वुमन्स च्याम्पियनसिप–२०७७ टि२० क्रिकेट प्रतियोगिता फाइनलमा पुगेको छ । उपाधिको लागि सुदूरपश्चिमले नेपाल एपिएफ क्लबसँग शनिवार खेल्ने छ ।

जितको लागि ७३ रनको विजयी लक्ष्य पछ्याएको सुदूरपश्चिमले १२.३ ओभरमा २ विकेट गुमाउँदै पूरा गर्यो । ओपनर मञ्जु बोगटी ३० बलमा ३ चौका सहित २६ रनमा आउट भइन् । विन्दु रावल २० बलमा २ चौका सहित १७ रनमा अविजित रहिन् । कविता जोशी ४ रनमा अविजित रहिन् । रेवती धामी २२ बलमा २ चौका सहित १७ रनमा आउट भइन् । कृतिका मरासिनीले २ विकेट लिइन् ।

त्यसअघि टियु क्रिकेट मैदानमा टस जितेर पहिला ब्याटिङ थालेको लुम्बिनीले २० ओभरमा ९ विकेट गुमाउँदै ७२ रन बनायो । लुम्बिनीकी विकेटकिपर लक्ष्मी चौधरीले २९ बलमा ३ चौका सहित २६ रनको योगदान दिइन् । कप्तान नेरी थापाले ११ रनमा आउट हुँदा वर्षा राना ८ रनमा अविजित रहिन् । लुम्बिनीका ९ खेलाडीले दोहोरो अंकमा रन बनाउन सकेनन् ।

चौथो ओभरको दोस्रो बलमा मध्यगतिकी बलर सुनिता लोहारले ओपनर नितु भण्डारीलाई ४ रनमा एलबिडब्लू आउट गर्दै पहिलो सफलता दिलाएकी थिइन् । नवौं ओभरको पाँचौं बलमा कविता जोशीले सरस्वती घर्तीमगरलाई ९ रनमा बोल्ड आउट गर्दै दोस्रो सफलता दिलाएकी थिइन् । १२ औं ओभरको पाँचौं बलमा लक्ष्मीले सुनिता लोहारबाट लक्ष्मी चौधरीलाई उत्कृष्ट क्याच आउट गराएपछि लुम्बिनी दबाबमा परेको थियो ।
१४ औं ओभरमा लक्ष्मीले तीन विकेट लिएपछि लुम्बिनीको संकटमा परेको थियो । सरस्वती पुन २, एलिसा केसी ३ मधु डिसी, स्वस्तिका बजागाई र कृतिका मरासिनीले खाता खोल्न सकेनन् ।

लक्ष्मीले मंगलबार प्रदेश १ विरुद्ध ह्याट्रिक गरेकी थिइन् । लुम्बिनी प्रदेशविरुद्ध पनि उच्च प्रदर्शन गर्दै ४ ओभरमा १७ रन खर्चेर ४ विकेट लिइन् । कप्तान ऋतु कनोजियाले ४ ओभरमा १४ रन खर्चेर ३ विकेट लिइन् । कविता जोशी, सुनिता लोहारले १–१ विकेट लिए ।

यो जितसँगै सुदूरपश्चिम ४ खेलमा ३ मा जित र १ मा हार सहित दोस्रो स्थानमा छ । एपिएफ ३ खेलमा ३ मानै जितका साथ शीर्ष स्थानमा छ । तीन महिना अघि प्रधानमन्त्री कप राष्ट्रिय महिला क्रिकेट प्रतियोगिता च्याम्पियन प्रदेश-१ ३ खेलमा २ हार र १ मा जित सहित २ अंकका साथ तेस्रो स्थानमा छ । ललितपुर-११ ले ३ खेलमा २ हार र १ मा जितका चौथो स्थानमा । लुम्बिनी तीनै खेलमा पराजित हुँदै पुछारमा छ ।