काठमाडौं (हाम्रो खेलकुद) – नेपाल एपिएफ क्लब ललितपुर मेयर वुमन्स च्याम्पियनसिप–२०७७ टि२० क्रिकेट प्रतियोगिता च्याम्पियन बनेको छ । शनिवार फाइनलमा सुदूरपश्चिम प्रदेशलाई ८ विकेटले पराजित गर्दै एपिएफ च्याम्पियन बनेको हो ।

च्याम्पियन एपिएफले ३ लाख र उप विजेता सुदूरपश्चिमले १ लाख ५० हजार प्राप्त गर्ने छन् । जितको लागि १ सय ७ रनको विजयी लक्ष्य पछ्याएको एपिएफले १६.२ ओभरमा २ विकेटको क्षतिमा पूरा गर्यो । एपिएफको जितमा ओपनर ज्योति पाण्डे ३८ बलमा ५ चौका सहित सर्वाधिक ३६ रनको योगदान दिइन् । कप्तान सीता राना मगर ३२ बलमा ४ चौका सहित २७ रनमा आउट भइन् । सीता र ज्योति दुबै रन आउट भएका थिए ।

ओपनर सीता र ज्योतिले पहिलो विकेटका लागि ६९ रनको उत्कृष्ट साझेदारी गरेपछि एपिएफले सहजै उपाधि जितेको हो । ईन्दु बर्मा १९ र ममता चौधरी १५ रनमा अविजित रहिन् ।

त्यसअघि टियु क्रिकेट मैदानमा टस जितेर पहिला ब्याटिङ थालेको सुदूरपश्चिमले निर्धारित २० ओभरमा विकेट गुमाउँदै १ सय ६ रन बनायो । सुदूरपश्मिचमकी शीर्षक्रमकी ब्याटर विन्दु रावल ५४ बलमा ४ चौका सहित सर्वाधिक ४४ रनमा अविजित रहिन् । सुदूरपश्चिमले ओपनिङ जोडीमा परिवर्तन गर्दै डली भट्ट र रेवती धामीलाई क्रिजमा पठाएको थियो । रेखा रावलको तेस्रो ओभरको पाँचौं बलमा फुलटस बलमा रेवती १० रनमा सीता रानामगरबाट क्याच आउट हुन पुगेकी थिइन् । रेवतीले १४ बलमा २ चौका प्रहार गरिन् ।

स्पिनर करुणा भण्डारीको आठौं ओभरको तेस्रो बलमा डली भट्ट पनि फुलटस बलमा १४ रनमा सहज कटएण्ड बोल्ड आउट हुन पुगेकी थिइन् । डलीले १२ बलमा १ चौका र १ छक्का प्रहार गरिन् । कविता कुँवर १५ बलमा २ चौका सहित १३ रनमा क्याच आउट भइन् । मध्यगतिकी बलर सुष्मा श्रेष्ठले सुनिता लोहारलाई शून्यमा बोल्ड आउट गरिन् । कविता जोशी ३, ऋतु कनोजिया ४ र मञ्जु बोगटी ३ रनमा आउट भए ।

एपिएफकी करुण भण्डारी, सुष्मा श्रेष्ठ, रेखा रावल, सीता रानामगर र बिना बुढामगरले १–१ विकेट लिए ।