एजेन्सी – ओपनर मोहम्मद रिजवानको उत्कृष्ट ब्याटिङको सहयोगमा पाकिस्तानले पहिलो टि२० खेलमा दक्षिण अफ्रिकालाई ४ विकेटले पराजित गरेको छ ।

योसँगै चार टि२० आई सिरिजमा पाकिस्तानले १–० को अग्रता लिएको छ । जितको लागि १ सय ८९ रनको बलियो विजयी लक्ष्य पछ्याएको पाकिस्तानले १९.५ ओभरमा ६ विकेट गुमाउँदै पूरा गर्यो । यो पाकिस्तानले आफ्नो टि२० आई इतिहासकै सर्वाधिक रन लक्ष्य सफलतापूर्वक पूरा (चेश) गरेको हो । पाकिस्तानका मोहम्मद रिजवान ५० बलमा ९ चौका र २ छक्का सहित ७४ रनमा अविजित रहे । हसन अलीले अन्तिम ३ बलमा ९ रन जोड्दै जित पक्का गरे ।

फहिम अशरफले १४ बलमा ४ चौका र १ छक्का सहित ३० रनको योगदान दिए । कप्तान बाबर आजम १४, फखर जमान २७, मोहम्मद हफिज १३ र हैदर अली १४ रनमा आउट भए । दक्षिण अफ्रिका बेउरन हेंड्रिक्सले ४ ओभरमा ३२ रन खर्चेर ३ विकेट लिए । तबरेज शाम्सीले २ विकेट लिए ।

त्यसअघि टस जितेर पहिला ब्याटिङ थालेको दक्षिण अफ्रिकाले निर्धारित २० ओभरमा ६ विकेट गुमाउँदै १ सय ८८ रन बनाएको थियो । दक्षिण अफ्रिका ओपनर एडेन माक्ररमले ३२ बलमा ८ चौका र १ छक्का सहित सर्वाधिक ५१ रनको योगदान दिए । कप्तान हेनरिक क्लासेन २८ बलमा २ चौका र ५ छक्का सहित ५० रनमा आउट भए । पिटे भान बिल्जोन ३४ र जानेमान मलान २४ रनमा आउट भए ।

पकिस्तानका हसन अलीले ४ ओभरमा २८ रन खर्चेर २ विकेट लिए । मोहम्मद नवाजले ४ ओभरमा २१ रन खर्चेर २ विकेट लिए । शाहिन शाह अफ्रिदी र हरिस रौफले १–१ विकेट लिए । दोस्रो खेल सोमबार हुने छ ।