काठमाडौं (हाम्रो खेलकुद) – नेपाली राष्ट्रिय क्रिकेट टोलीका ओपनर कुशल भुर्तेल र आसिफ शेखले विश्व टि२० आई क्रिकेटमा दुर्लभ विश्व कीर्तिमान बनाएका छन् ।

मलेसियाविरुद्ध सोमबार १ सय २ रनको शतकीय साझेदारी गर्दै यो जोडीले नयाँ विश्व कीर्तिमान कायम गरे । नेदरल्यान्ड्सविरुद्ध पहिलो खेलमा पनि शतकीय साझेदारी गरेको यो जोडी विश्व टि२० आई क्रिकेटमा लगातार दुई खेलमा दुई शतकीय साझेदारी गर्ने विश्वका पहिलो जोडी बन्न सफल भए ।

कुशल र आसिफको जोडीले पहिलो खेलमा नेदरल्यान्ड्सविरुद्ध १२.४ ओभरमा १ सय १६ रनको शतकीय साझेदारी गरेका थिए । जुन नेपालबाट टि२० आईमा ओपनिङमा बनेको सर्वाधिक ठूलो साझेदारी पर्दछ । त्यस्तै दोस्रो खेलमा मलेसियाविरुद्ध ११.१ ओभरमा १ सय २ रनको उत्कृष्ट साझेदारी गरेका थिए । जुन नेपालबाट मात्र होईन टि२० विश्व क्रिकेटमा लगातार दुई खेलमा दुई शतकीय साझेदारी पहिलो पटक बनेको हो ।

कुशल पहिलो खेलमा ६२ रनमा आउट हुँदा मलेसियासाग ६१ रनमा अविजित रहेका थिए । आसिफ पहिलो खेलमा नेदरल्यान्ड्ससँग ५४ रनमा अविजित रहँदा दोस्रो खेलमा ४२ रनमा आउट भएका थिए ।

यसअघि सन् २०१० केन्या ओपनर डेविड ओबुया र स्टिभ टिकलोले स्कटल्यान्ड र युगान्डासँगको खेलमा ओपनिङ गर्दै दुई शतकीय साझेदारी गरेका थिए । स्कटल्यान्डविरुद्ध १ सय १० र १ सय २६ रनको दुई शतकीय साझेदारी गरेका थिए । तर ती खेल लगातार भने थिएन । स्टिभले यी दुई खेलबीच भएको युगान्डाविरुद्धको एक खेलेका थिएनन् । समग्रमा स्टिभ र ओबुयाले गरेको साझेदारीमा भने दुवै खेलमा शतकीय साझेदारी नै थियो ।

समग्रमा विश्व टि२० आई क्रिकेटमा एकै जोडीले दुई पटक शतकीय साझेदारी १५ पटक गरेका छन् । अष्ट्रेलिया आक्रामक ब्याट्सम्यान ग्लेन म्याक्सवेल र ट्राभिस हेडले ३ इनिङमा २०१६ देखि २०१८ मा गरि दुई शतकीय साझेदारी गरेका थिए । टि२० आईमा सर्वाधिक शतकीय साझेदारी गर्ने कीर्तिमान भारतीय क्रिकेट टोलीका ओपनर शिखर धवन र रोहित शर्मा तथा न्युजिल्यान्डका मार्टिन गुप्टिल र केन विलियम्सनको नाममा छ । यी जोडीले टि२० आईमा ४–४ पटक शतकीय साझेदारी गरेका छन् ।

नेदरल्यान्ड्सविरुद्ध गरेको १ सय १६ रनको साझेदारी कुनै पनि दुई डेब्यू खेलाडीले गरेको पहिलो शतकीय साझेदारी थियो । टि२० आईमा दुई डेब्यू खेलाडीले बनाएको उच्च रन ९० रन थियो । मोजाम्बिकबाट छैटौं विकेटका मलावीविरुद्ध सन् २०१९ मा डामिसो कुवानो र फिलिप कोसाले ९० रनको साझेदारी गरेका थिए । जुन साझेदारी कुशल र आसिफले तोडेका थिए । तेस्रो स्थानमा दक्षिण अफ्रिका ग्रिम स्मिथ र ज्याक्स कालिसले न्युजिल्यान्डविरुद्ध सन् २००५ मा ८४ रनको साझेदारी गरेका थिए ।