काठमाडौं (हाम्रो खेलकुद) – नेपाली राष्ट्रिय क्रिकेट टोलीका उपकप्तान दीपेन्द्र सिंह ऐरीले त्रिकोणात्मक टि२० आई सिरिज अन्तर्गत नेदरल्यान्ड्सविरुद्ध अर्धशतक प्रहार गरेका छन् ।

टियु क्रिकेट मैदानमा टस जितेर पहिला ब्याटिङ थालेको नेपालले १६ ओभरमा ४ विकेट गुमाउँदै १ सय ६६ रन बनाएको छ । दीपेन्द्रले २८ बलमा आफ्नो टि२० आई करिअरको पहिलो अर्धशतक प्रहार गरे । १६ औं ओभरको पहिलो बलमा दीपेन्द्रले कप्तान पिटर शिलारलाई छक्का प्रहार गर्दै आफ्नो टि२० आई करिअरको पहिलो अर्धशतक पूरा गरेका थिए ।

दीपेन्द्रको यसअघि टि२० आईमा उच्च रन सन् २०१९ मा यूएईविरुद्ध दोस्रो टि२० आईमा ४७ रन थियो । दीपेन्द्र ३० बलमा ३ चौका र ५ छक्का सहित ६० रनमा क्याच आउट भएका छन् । कुशल र विनोद भण्डारी क्रिजमा छन् । ओपनर कुशल भुर्तेल ४६ बलमा ८ चौका र १ छक्का सहित ६२ रनमा क्याच आउट भए । कुशल भुर्तेलले लगातार तीन अर्धशतक प्रहार गरेका हुन् । कुशलले १३ औं ओभरको अन्तिम बलमा स्पिनर आर्यन दत्तलाई छक्का साथ ४१ बलमा अर्धशतक पूरा गरेका थिए ।

सुरुवाती दुई खेलमा शतकीय साझेदारी ओपनिङ गरेको नेपालले तेस्रो खेलको नेदरल्यान्ड्सविरुद्ध २० रन जोड्दा पहिलो विकेट गुमाउन पुगेको । तीव्र गतिका बलर भिभिन किंगमाको बलमा आसिफ मिडअनमा बेन कुपर बाट शून्यमा क्याच आउट भएका थिए । दोस्रो विकेटका लागि कप्तान ज्ञानेन्द्र मल्ल र कुशलले ४३ रनको साझेदारी गरेका थिए ।

कप्तान तथा स्पिनर पिटर सिलारको बलमा ठूलो सट खेलेका ज्ञानेन्द्र डीप मिडविकेटमा बास डी लिडबाट २० रनमा क्याच आउट हुन पुगेका थिए । ज्ञानेन्द्रले १४ बलमा २ चौका र १ छक्का प्रहार गरे । कुशल भुर्तेल १५ औं ओभरको तेस्रो बलमा मिडविकेटमा बास डी लिडबाट क्याच आउट हुन पुगेका थिए ।