काठमाडौं (हाम्रो खेलकुद) – नेपाली राष्ट्रिय क्रिकेट टोलीका युवा ओपनर कुशल भुर्तेल अन्तर्राष्ट्रिय क्रिकेट परिषद् (आइसिसी) को विश्व टि२० वरियतामा पहिलो पटक परेका छन् ।

आइसिसीले मंगलबार जारी गरेको नयाँ वरियतामा ब्याटिङतर्फ कुशल ९३ औं स्थानमा छन् । कुशलको ३ सय ५९ रेटिङ अंक छ ।त्रिकोणात्मक टि२० आई सिरिज अन्तर्गत वैशाख ४ मा कुशलले नेदरल्यान्ड्ससँग डेब्यू गर्दै ६२ रनको इनिङ खेलेका थिए । टि२० आई त्रिकोणात्मक सिरिजमा डेब्यू गर्दै लगातार तीन अर्धशतक प्रहार गर्दै विश्व कीर्तिमान बनाएपछि कुशल आइसिसीको ब्याटिङको ९३ औं स्थानमा अटाएका छन् ।

कुशल मलेसियासँग ६१ रन बनाउँदा नेदरल्यान्ड्सँग दोस्रो खेलमा ६२ रन बनाएका थिए । कुशल टि२० आई करिअरको सुरुवाती तीन टि२० आई खेलमा लगातार अर्धशतक प्रहार गर्ने पहिलो खेलाडी हुन् । यसअघि इंग्ल्यान्डका ब्याट्सम्यान डेविड मलानले टि२० आई करिअरमा सुरुवाती दुई खेलमा लगातार दुई अर्धशतक प्रहार गरेका थिए ।

यता पारस खड्का भने वरियतामा खस्किएका छन् । पारस एकै पटक १० स्थान खस्किदै ८३ औं स्थानमा पुगेका छन् । पारसले चोटका कारण यस त्रिकोणात्मक सिरिज भने खेलेका छैनन् । लेगस्पिनर सन्दीप लामिछानेले ७ स्थान सुधार गर्दै ७७ औं स्थानमा छन् । विश्व टि२० वरियतामा ब्याटिङमा डेविड मलान, बलिङमा दक्षिण अफ्रिका स्पिनर तबरेज शाम्सी र अलराउन्डरमा अफगानिस्तानका मोहम्मद नाबी शीर्ष स्थानमा छन्