एजेन्सी – बार्सिलोनाले १० खेलाडीमा सीमित भिल्लारियललाई २-० ले पराजित गर्दै ला लिगाको शीर्ष स्थानमा ४ अंकको अग्रता पुनः कायम गरेको छ।

एस्टाडियो दे ला सेरामिकामा भएको खेलमा बार्सिलोनाका लागि राफिन्हा र लामिन यामालले गोल गरे। प्रशिक्षक हान्सी फ्लिकको टोलीले सुरुदेखि नै खेलमा नियन्त्रण जमाएको थियो।

खेलको १२औँ मिनेटमै बार्सिलोनाले अग्रता लियो। सान्ती कोमेसानाले आफैलाई फाउल गरेपछि पाएको पेनाल्टीलाई राफिन्हाले गोलमा परिणत गरे। त्यसपछि राफिन्हाको अर्को प्रहार क्रसबारमा लागेको थियो।

भिल्लारियलले पहिलो हाफमै बराबरी गोल गरेको जस्तो देखिए पनि जुल्स कुन्डेको आत्मघाती गोल अफसाइडका कारण मान्य भएन।

पहिलो हाफमा ६ मिनेट बाँकी रहँदा यामालमाथि खतरनाक दुई खुट्टाले ट्याकल गरेपछि रेनाटो भेइगालाई सिधै रातो कार्ड देखाइयो । जसका कारण घरेलु टोली १० खेलाडीमा सीमित भयो।

६३औँ मिनेटमा बार्सिलोनाले अग्रता दोब्बर बनायो। वैकल्पिक खेलाडी रोबर्ट लेवान्डोस्कीको प्रहार गोलकिपरले बचाएपछि आएको बलमा यामालले सहजै गोल गरे।

इन्जुरी समयमा बार्सिलोनाले तेस्रो गोल गर्ने अवसर पनि बनायो तर सर्जी कार्डोनाले गोललाइनमै क्लियर गर्दै मार्कस रासफोर्डको प्रयास विफल बनाए।

ला लिगाका अन्य खेलमा एट्लेटिको म्याड्रिडले जिरोनालाई ३-० ले, इल्चेले रायो भालेसानोलाई र रियल बेटिसले गेटाफेलाई‌ समान ४-० ले हरायो।