काठमाडौं (हाम्रो खेलकुद)– फाइनल पुगिसकेको नेपाल र मलेसियाको राष्ट्रिय क्रिकेट टोलीबीच त्रिकोणात्मक टि २० आई सिरिजको राउन्ड रोविन लिगको अन्तिम खेल आज हुँदैछ । कीर्तिपुरस्थित त्रिवि मैदानमा खेल दिउँसो १ः१५ बजे सुरु हुनेछ । सिरिजको अर्को टोली नेदरल्यान्ड्स फाइनल पुगिसकेको छ । नेपाल र नेदरल्यान्ड्सबीच शनिबार फाइनल हुनेछ ।

नेपाल ३ खेलमा २ मा जित र १ मा हार सहित ४ अंकका साथ दोस्रो स्थानमा छ । आजको खेल जितेमा नेपाल शीर्षस्थानमा पुग्ने छ । नेदरल्यान्ड्स ४ खेलमा २ मा जित, १ मा हार र १ मा बराबरी सहित ५ अंकका साथ शीर्ष स्थानमा छ । मलेसिया ३ खेलमा १ अंक छ ।
नेपालले यहि सिरिजको पहिलो खेलमा मलेसियालाई ९ विकेटले हराएको थियो ।

नेपालको ओपनिङले उच्च प्रदर्शन गरेका हरेक खेलमा नेपालले उत्कृष्ट सुरुवात गर्दै आएको छ । मलेसियाविरुद्ध पहिलो खेलमा १ सय १० रनको लक्ष्य नेपालले १२.१ ओभरमा १ विकेट गुमाउँदै पूरा गरेको थियो । ओपनर कुशल भुर्तेल ४१ बलमा ३ चौका र ५ छक्का सहित ६१ रनमा अविजित रहका थिए । आसिफ शेखले २९ बलमा ४ चौका र १ छक्का सहित ४२ रन बनाएका थिए । पहिलो विकेटका लागि कुशल र आसिफले ११.१ ओभरमा १ सय २ रनको उत्कृष्ट शतकीय साझेदारी गरेपछि नेपालले सानदार जित दर्ता गरेको थियो । त्यो खेलमा दीपेन्द्रसिंह ऐरी ६ रनमा अविजित रहेका थिए ।

यद्दपी नेदरल्यान्ड्सविरुद्धको दोस्रो खेलमा भने २ सय ६ रन बनाउँदा पनि नेपालले हार टार्न सकेन । मलेसियाले अघिल्ला ३ खेलमध्ये २ खेलमा हार र बुधबार नेदरल्यान्ड्ससँगको खेलमा बराबरी गर्दै १ अंक जोडेको थियो । फाइनल समिकरण पूरा भइसकेकोले आजको खेल प्रतिष्ठाका लागि हुनेछ ।

यसैबीच, नेपाली टोलीका लेग स्पिनर सन्दीप लामिछानेले त्रिकोणात्मक टि२० आई सिरिजमा ऐतिहासिक आफ्नो सयौं खेल खेल्दैछन् । बिहिबार सन्दीप मलेसियाविरुद्ध मैदान उत्रँदा टि२० क्रिकेटमा एक सय खेल खेल्ने पहिलो नेपाली खेलाडी बन्ने छन् । हालसम्म सन्दीपले ९९ टि२० खेल खेलेका छन् । सन्दीपले सन् २०१८ मा इन्डियन प्रिमियर लिग (आइपिएल) बाट टि२० क्रिकेट खेल्न सुरु गरेका थिए ।

दिल्ली क्यापिटल्सबाट रोयल च्यालेन्जर्स बेंगलोरविरुद्ध मे १२ मा डेब्यू गर्दै पहिलो टि२० खेलेका सन्दीपले त्यसयता लगातार क्रिकेट खेल्दै आएका छन् । सन्दीपले टि२० आईमा विश्व ११ बाट वेस्टइन्डिजविरुद्ध २०१८ मे ३१ मा टि२० आईमा डेब्यू गरेका थिए । सन्दीप आफ्नो देशबाट नभएर संयुक्त टोलीबाट टि२०आई डेब्यू गर्ने पहिलो खेलाडी समेत हुन् । सन्दीपले नेपालबाट हालसम्म २४ र टेष्ट देशको फ्रेन्चाइज लिगमा कुल ७५ खेल खेलेका छन् ।

सन्दीपपछि नेपालबाट सर्वाधिक पूर्व कप्तान पारस खड्काले ५६ टि२० खेल खेलेका छन् । नेपालको लागि २० खेल जुन सर्वाधिक हो । त्यस्तै ज्ञानेन्द्र मल्ल ५३, विनोद भण्डारी ४६, वसन्त रेग्मी र शरद भेषावकरले ४०–४० खेल खेलेका छन् । सन्दीप नेपालबाट टि२० मा सर्वाधिक विकेट लिने बलरको सुचिमा दोस्रो स्थानमा छन् । उनले नेपालका लागि टि२० मा ४२ विकेट लिएका छन् ।