काठमाडौं (हाम्रो खेलकुद) – नेपाली तीब्र गतिका बलर कमल सिंह ऐरीले त्रिदेशिय टि–ट्वान्टी अन्तराष्ट्रिय सिरिज मार्फत मलेसियाविरुद्ध टि ट्वान्टी अन्तराष्ट्रिय क्रिकेटमा डेब्यु गरेका छन् । कीर्तिपुरस्थित त्रिवि मैदानमा जारी सिरिजमा कमल डेब्यू गर्ने चौथो खेलाडी हुन् । नेदरल्यान्ड्सविरुद्धको पहिलो खेलमा कुशल भुर्तेल, आसिफ सेख, सहाब आलमले डेब्यू गरेका थिए ।

कमलले राष्ट्रिय टोलीबाट एक दिवसिय क्रिकेटमा डेब्यू गरिसकेका छन् । कमलले २०७६ को माघ २६ गते घरेलु मैदानमै भएको आईसीसी विश्वकप लिग २ अन्तर्गत ओमानविरुद्ध डेब्यू गरेका थिए ।

सन् २०१६ मा श्रीलंकामा भएको यू–१९ एसिया कपबाट यात्रा अघि बढाएका कमलले सेप्टेम्बरमा श्रीलंकामा नै भएको यू–१९ एसिया कप बाट उमेर समुहको यात्रा सकाएका थिए। उमेर समूह र घरेलु क्रिकेट खेल्दै आएका कमलले तल्लोक्रममा ब्याटिङ सम्हाल्ने क्षमता समेत राख्छन् । श्रीलंकासँग यू १९ टोलीसँग डेब्यू गर्दै ३ विकेट लिनुको साथै ९ रन बनाएका थिए ।

कमलले एभरेष्ट प्रिमियर लिगमा चितवन टाइगर्स, धनगढी प्रिमियर लिगमा च्याम्पियन सिवाईसी अत्तरिया र पोखरा प्रिमियर लिगमा धनगढी ब्लुजबाट खेलेका थिए। फ्रेन्चाइज बाहेकका अन्य घरेलु प्रतियोगितामा भने कमलले सशस्त्र प्रहरी बल एपिएफको जर्सीमा देखिन्छन् । कमल गत माघमा सम्पन्न चौथो संस्करणको प्रधानमन्त्री कप एकदिवसिय क्रिकेट प्रतियोगिता सर्वोत्कृष्ट खेलाडी बनेका थिए ।

नेपालले आजको खेलमा दुई खेलाडी परिवर्तन गरेको छ । साहब आलम र अभिनाष बोहराको ठाँउमा कमलसिंह ऐरी र सुसन भारीले मौका पाएका छन् । नेपाल यसअघि नै फाइनल पुगिसकेको छ भने मेलेसिया सिरिजबाट बाहिरिसकेको छ । नेपाल ३ खेलमा २ मा जित र १ मा हार सहित ४ अंकका साथ दोस्रो स्थानमा छ । आजको खेल जितेमा नेपाल शीर्षस्थानमा पुग्ने छ । नेदरल्यान्ड्स ४ खेलमा २ मा जित, १ मा हार र १ मा बराबरी सहित ५ अंकका साथ शीर्ष स्थानमा छ । मलेसिया ३ खेलमा १ अंक छ । नेपालले यहि सिरिजको पहिलो खेलमा मलेसियालाई ९ विकेटले हराएको थियो ।