एजेन्सी – युवा ब्याट्सम्यान देवदत्त पाडिक्कलको सानदार शतकको सहयोगमा रोयल च्यालेन्जर्स बेंगलोरलले इन्डियन प्रिमियर लिग (आइपिएल) २०२१ मा राजस्थान रोयल्सलाई १० विकेटले पराजित गरेको छ ।

योसँगै बेंगलोर लगातार चौथो जितका साथ अंक तालिकामा शीर्षस्थानमा उक्लिएको छ । जितको लागि १ सय ७८ रनको विजयी लक्ष्य पछ्याएको बेंगलोरले १६.३ ओभरमा कुनै विकेट नगुमाई पूरा गर्यो । बेंगलोरको जितमा ओपनर देवदत्त पाडिक्कल ५२ बलमा ११ चौका र ६ छक्का सहित १ सय १ रनमा अविजित रहे । पाडिक्कले ५१ बलमा आफ्नो आइपिएल करिअरको पहिलो शतक पूरा गरेका थिए । मुस्ताफिजुर रहमानलाई १७ औं ओभरको पहिलो बलमा चौका प्रहार गर्दै शतक पूरा गरेका थिए । कप्तान विराट कोहली ४७ बलमा ६ चौका र ३ छक्का सहित ७२ रनमा अविजित रहे ।

त्यसअघि वानखडे स्टेडियम मुम्बईमा टस हारेर पहिला ब्याटिङ थालेको राजस्थानले निर्धारित २० ओभरमा ९ विकेट गुमाउँदै १ सय ७७ रन बनायो ।राजस्थानका युवा अलराउन्डर शिवम दुबेले ३२ बलमा ५ चौका र २ छक्का सहित सर्वाधिक ४६ रनको योगदान दिए । तल्लोक्रममा राहुल टेवाटियाले २३ बलमा ४ चौका र २ छक्का सहित ४० रन जोड्दै टोलीलाई प्रतिस्पर्धात्मक योगफलमा पुर्याएका थिए । ओपनर जस बटलर ८ र मनान बोहरा ७ रनमा आउट हुँदा राजस्थानले खराब सुरुवात गरेको थियो ।

बटलरलाई बोल्ड आउट गरेका मोहम्मद शिराजले डेविड मिलरलाई शून्यमा एलबिडब्लू आउट गरे । कप्तान सञ्जु स्यामसन १८ बलमा २ चौका र १ छक्का सहित २१ रनमा आउट भए । युवा ब्याट्सम्यान रियान पराग १६ बलमा ४ चौका सहित २५ रनमा आउट भए । क्रिस मोरिस १० रनमा आउट हुँदा श्रेयस गोपाल ७ रनमा अविजित रहे ।

बेंगलोरका तीव्र गतिका बलर मोहम्मद शिराजले ४ ओभरमा २७ रन खर्चेर ३ विकेट लिए । हर्षल पटेलले ४ ओभरमा ४७ रन खर्चेर ३ विकेट लिए । काइल जामिसन, केन रिचर्ड्सन र वासिन्टन सुन्दरको नाममा १–१ विकेट रह्यो ।

आइपिएलमा बेंगलोरले १० विकेटको जित चौथो पटक निकालेको हो । यसअघिका तीन १० विकेटको जित लक्ष्य एक सय भन्दा कम थियो । बेंगलोरले १० विकेटको जित निकालेको यो हालसम्मकै ठूलो लक्ष्य हो ।

यो जितसँगै बेंगलोर ४ खेलमा ८ अंकका साथ शीर्ष स्थानमा उक्लिएको छ । चेन्नई ४ खेलमा ३ मा जित र १ मा हार सहित दोस्रो स्थानमा छ । दिल्ली ४ खेलमा ३ मा जित र १ मा हार सहित ६ अंक भएपनि नेटरनरेटका आधारमा तेस्रो स्थानमा छ । मुम्बई ४ खेलमा समान २ मा जित र २ मा हार सहित ४ अंक जोड्दै चौथो स्थानमा छ ।

सनराइजर्स हैदराबाद पाँचौं, कोलकाता नाइट राइडर्स छैटौं, पन्जाब किंग्स सातौं र राजस्थान पुछारमा छन् । यी चारै टोलीको समान २ अंक छ ।
बेंगलोरले अव आइतबार वानखडेमानै चेन्नईसँग खेल्ने छ । राजस्थानले शनिवार कोलकातासँग वानखडेमानै प्रतिस्पर्धा गर्ने कार्यक्रम छ ।