काठमाडौं (हाम्रो खेलकुद) – राष्ट्रिय क्रिकेट टोलीका युवा ओपनर आशिफ शेखले टोलीले त्रिकोणात्मक टि२० आई सिरिजको फाइनलमा ठूलो इनिङको आशा रहेको बताएका छन् ।

आसिफले वैशाख ४ मा त्रिकोणात्मक सिरिज अन्तर्गत नेदरल्यान्ड्सँग टि२० आईमा डेब्यू गर्दै अर्धशतक प्रहार गरेका थिए । नेपाललाई ९ विकेटको सानदार जित दिलाउन आसिफले ३८ बलमा ४ चौका र ४ छक्का सहित अविजित ५४ रनको इनिङ खेलेका थिए । पहिलो खेलमै कुशल भुर्तेलसँग नेपाली टि२० आईकै ओपनिङ सर्वाधिक १ सय १६ रनको साझेदारी गरेका थिए ।

दोस्रो खेलमा मलेसियासँग पनि आसिफले कुशलसँग १ सय २ रनको शतकीय साझेदारी गर्दै राम्रो सुरुवात दिलाएका थिए । जसक्रममा ४२ रनमा आउट भएका थिए । नेदरल्यान्ड्ससँग शून्यमा आउट हुँदा लिगको अन्तिम खेलमा आसिफ ४२ रन बनाउँदै आउट भएका थिए ।

आसिफले घरेलुमा पनि उत्कृष्ट सुरुवात दिलाएपनि ठूलो इनिङमा भने चुक्दै आएका छन् । त्रिकोणात्मक सिरिजमा पनि आसिफको प्रदर्शन घरेलु क्रिकेटमा जस्तै छ । ‘म पनि सुरुवात पाई सकेपछि सकेसम्म लामो इनिङमा बदलौं र २० ओभरनै खेलौं प्रयास गरि रहेको छु । दुर्भाग्य हुन सकेको छैन । भोली फाइनल छ । फाइनलमा ठूलो इनिङको आशा छ’, आसिफले हाम्रो खेलकुदसँग कुरा गर्दै भने ।

‘हामीले पछिल्लो एक हप्तामा उत्कृष्ट क्रिकेट खेलेका छौं । नेदरल्यान्ड्स पनि राम्रो टोली हो । फाइनल प्रतिस्पर्धात्क हुने छ । हामी उपाधि जित्नेमा आत्माविश्वासी छौं । सबै खेल हामीले राम्रो रन बनाएका छौं । कुनैपनि कमजोर खेलेका छैनौं । एक दुई वटा गल्तीले गर्दा नेदरल्यान्ड्ससँग हारेका थियौं’, उनले भने ।

‘हरेक खेल मेरो लागि महत्वपूर्ण छ । त्यो जुनसुकै होस् । त्यो घरेलु होस् वा अन्तर्राष्ट्रिय । मैरो ध्यान सबैमा रन बनाउने र निरन्तरता दिने हो, उनले आफ्नो प्रदर्शन बारे भने । हामीले सुरुवात दिएर मात्र हुँदैन अन्त्य पनि गर्न सक्नुपर्छ’, उनले भने ।

नेपालले चारै खेलमा ब्याटिङमा उच्च प्रदर्शन गरेको छ । पछिल्ला दुबै खेलमा २ सय माथि रन बनाएको छ । ब्याटिङ सुधार हुनुमा यसको श्रेय प्रशिक्षक देभ ह्वाटमोरलाई जाने आसिफ बताउँछन् ।

‘यसको श्रेय ह्वाटमोरलाई जान्छ । उहाँले विचारनै परिवर्तन गर्नु भएको छ । मानसिक परिवर्तन भएको छ । हामीले राम्रो क्रिकेट पनि खेलेका छौं । विकेट पनि राम्रो हो । मिहिनेत देखिएको हो । लकडाउन होस् प्रधानमन्त्री कपमा गरेको तयारी र मिहिनेत अहिले देखि रहेको छ । ब्याटिङमा अझै सुधार गर्न सक्छौं’, उनले भने ।

नेपाल र नेदरल्यान्ड्सबीच फाइनल शनिवार हुने छ । नेपाल शीर्ष र नेदरल्यान्ड्स दोस्रो स्थानमा रहँदै फाइनमा प्रतिस्पर्धा गर्न लागेका हुन् । लिग चरणमा पहिलो खेलमा नेपाल ९ विकेटले विजयी हुँदा दोस्रो खेलमा ३ विकेटले पराजित भएको थियो ।