एजेन्सी – इन्डियन प्रिमियर लिग (आइपिएल) २०२१ मा साविक विजेता मुम्बई इन्डियन्समाथि पन्जाब किंग्सले ९ विकेटको सहज जित निकालेको छ । जितको लागि १ सय ३२ रनको विजयी लक्ष्य पछ्याएको पन्जाबले १७.४ ओभरमा १ विकेटको क्षतिमा पूरा गर्यो ।

पन्जाबका ओपनर तथा कप्तान लोकेश राहुल ५२ बलमा ३ चौका र ३ छक्का सहित ६० रनमा अविजित रहे । क्रिस गेल ३५ बलमा ५ चौका र २ छक्का सहित ४३ रनमा अविजित रहे । ओपनर मयंक अग्रवाल २० बलमा ४ चौका र १ छक्का सहित २५ रनमा आउट भए । कप्तान लोकेश राहुल (केएल) र क्रिस गेलले दोस्रो विकेटका लागि ७९ रनको अविजित साझेदारी गरेका थिए । मुम्बईका राहुल चहरले १ विकेट लिए ।

त्यसअघि चेन्नईमा टस हारेर पहिला ब्याटिङ थालेको मुम्बईले निर्धारित २० ओभरमा ६ विकेट गुमाउँदै १ सय ३१ रन बनाएको थियो । मुम्बईका कप्तान रोहित शर्माले ५२ बलमा ५ चौका र २ छक्का सहित सर्वाधिक ६३ रनको योगदान दिए । सूर्यकुमार यादवले २७ बलमा ३ चौका र १ छक्का सहित ३३ रन बनाए ।

दीपक हुडाले दोस्रो ओभरको अन्तिम बलमा क्विन्टन डी ककलाई ३ रनमा क्याच आउट गराएका थिए । सातौं ओभरको अन्तिम बलमा रवि विश्रोईले ईशान किशनलाई ६ रनमा लोकेश राहुलबाट क्याच आउट गराएका थिए । किशनले १७ बलमा ६ रन मात्र जोडे । सात ओभरमा मुम्बईले मात्र २६ रन जोडेको थियो ।

तेस्रो विकेटका लागि सूर्य र रोहितले ५६ बलमा ७९ रनको साझेदारी गर्दै इनिङ सम्हालेका थिए । सूर्यलाई रवि विश्रोईले क्रिस गेलबाट क्याच आउट गराएका थिए । काईरन पोलार्डले १६, हार्दिक पान्ड्या १ र क्रुनाल पान्ड्याले ३ रन बनाए ।

पन्जाबका लागि युवा स्पिनरले रवि विश्रोईले जारी आइपिएलको पहिलो खेल खेल्दै ४ ओभरमा २१ रन खर्चेर २ विकेट लिए । मोहम्मद शामीले ४ ओभरमा २१ रन खर्चेर २ विकेट लिए । दीपक हुडा र अर्शदीप सिंहको नाममा १–१ विकेट रह्यो ।

अंक तालिका

बेंगलोर ४ खेलमा ८ अंकका साथ शीर्ष स्थानमा छ। चेन्नई ४ खेलमा ३ मा जित र १ मा हार सहित दोस्रो स्थानमा छ । दिल्ली ४ खेलमा ३ मा जित र १ मा हार सहित ६ अंक भएपनि नेटरनरेटका आधारमा तेस्रो स्थानमा छ । मुम्बई ५ खेलमा ३ मा हार र २ मा जित सहित ४ अंक जोड्दै चौथो स्थानमा छ ।

पन्जाब ५ खेलमा ३ मा हार र २ मा जित सहित पाँचौं स्थानमा उक्लिएको छ । सनराइजर्स हैदराबाद छैटौं, कोलकाता नाइट राइडर्स सातौं र राजस्थान रोयल्स पुछारमा छन् । यी तीन टोलीको समान २ अंक छ । पन्जाबले अब सोमबार नरेन्द्रमोदी स्टेडियम अहमदाबादमा कोेलकतासँग खेल्ने छ । मुम्बईले राजस्थानसँग अप्रिल २९ मा दिल्लीसँग खेल्ने छ ।