काठमाडौं (हाम्रो खेलकुद) – नेपाली राष्ट्रिय क्रिकेट टोलीका युवा ओपनर कुशल भुर्तेलले त्रिकोणात्मक टि२० आई सिरिज अन्तर्गत फाइनलमा नेदरल्यान्ड्सविरुद्ध अर्धशतक प्रहार गरेका छन् । टियु क्रिकेट मैदानमा टस हारेर पहिला ब्याटिङ थालेको नेपालले १३ ओभरमा २ विकेट गुमाउँदै १ सय २६ रन बनाएको छ ।

कुशलले ४३ बलमा जारी अर्धशतक पूरा गरेका हुन् । कुशलले १३ औैं ओभरको चौथो बलमा छक्का साथ अर्धशतक पूरा गरेका थिए । भुर्तेल नेपालबाट एकै सिरिजमा चार अर्धशतक प्रहार गर्ने भने पहिलो खेलाडी हुन् । कुशल नेपालबाट सर्वाधिक अर्धशतक प्रहार गर्ने टि२० आईमा दोस्रो खेलाडी हुन् । पारसले टि२० आईमा ५ अर्धशतक प्रहार गरेका छन् ।

नेपालका ओपनर कुशल भुर्तेल ४५ बलमा ६ चौका र २ छक्का सहित ६३ रनमा क्रिजमा छन् । कुशललाई युवा अलराउन्डर कुशल मल्लले १२ रनमा साथ दिएका छन् । कुशल भुर्तेलले क्याच ड्रपको कारण ब्यक्तिगत १२ रनमा जीवनदान पाएका थिए ।

पहिलो विकेटका लागि आसिफ र कुशलले २.२ ओभरमा ३० रनको साझेदारी गरेका थिए । स्पिनर फिलिपे बोइससेवेनको बलमा ठूलो सट खेलेका आसिफ लङअफमा पाउल भान मिकेरेनले उत्कृष्ट क्याच लिएपछि नेपालले पहिलो विकेट गुमाएको थियो । आसिफले ८ बलमा २ छक्का र १ चौका सहित १६ रन बनाए ।

दोस्रो विकेटका लागि कप्तान ज्ञानेन्द्र मल्ल र कुशलले ५७ रनको अर्धशतकीय साझेदारी गर्दै इनिङ सम्हालेका थिए । ज्ञानेन्द्र बोइससेवेनको १० औं ओभरको तेस्रो बलमा ठूलो सट खेल्ने धुनमा कभरमा पिटर शिलारबाट क्याच आउट हुन पुगे । ज्ञानेन्द्र ठूलो सट खेल्न खोजेपनि लिडिङ एजको कारण सफल हुन सकेनन् । ज्ञानेन्द्र १९ बलमा ३ चौका र २ छक्का सहित ३३ रनमा आउट भए ।