काठमाडौं (हाम्रो खेलकुद) – त्रिकोणात्मक टि२० आई सिरिजको फाइनलमा नेपालले प्रस्तुत गरेको विशाल लक्ष्य पछ्याएको नेदरल्यान्ड्सले खराब सुरुवात गरेको छ । नेपालले प्रस्तुत गरेको २ सय ३९ रनको विशाल लक्ष्य पछ्याएको नेदरल्यान्ड्सले ६ ओभरमा ३७ रन बनाउँदै ४ विकेट गुमाएको छ ।

ओपनर म्याक्स ओडाउड १९ बलमा २ चौका र १ छक्का सहित २० रनमा आउट भएका छन् । कप्तान पिटर शिलार र स्कर्ट एडवार्ड्स क्रिजमा छन् । दोस्रो ओभरको पाँचौं बलमा स्लिपमा रहेका आसिफ शेखले डाइरेक्ट स्टम्प ताक्दै ओपनर टोबियस भिसेलाई २ रनमा पेभिलिएन पर्काएका थिए । चौथो ओभरको अन्तिम बलमा बेन कुपर ७ रनमा क्याच आउट भए । बास डी लिडे १ रनमा आउट भए ।

त्यसअघि टियु क्रिकेट मैदानमा टस हारेर पहिला ब्याटिङ थालेको नेपालले निर्धारित २० ओभरमा ३ विकेट गुमाउँदै २ सय ३८ रन बनाएको थियो । नेपालले यो टि२० आई इतिहासमै बनाएको सर्वाधिक ठूलो योगफल हो । नेपालले लगातार तेस्रो पटक २ सय भन्दामाथिको योगफल बनाएको हो । नेपालले नेदरल्यान्ड्सँग दोस्रो खेलमा २ सय ६ र मलेसियाविरुद्ध २ सय १७ रन बनाएको थियो । समग्रमा चौथो पटक नेपालले २ सयमाथि योगफल बनाएको हो । पहिलो पटक सन् २०१९ को १३ औं दक्षिण एसियाली खेलकुद (साग) मा भुटानविरुद्ध २ सय ३६ रन बनाएको थियो । जुन नेपालको टि२० क्रिकेटमा सर्वाधिक योगफल हुँदै आएको थियो ।