काठमाडौं (हाम्रो खेलकुद) – राष्ट्रिय क्रिकेट टोलीका कप्तान ज्ञानेन्द्र मल्लले युवा खेलाडीले नेपाललाई आगमी दिनमा धेरै अगाडि बढाउन सक्ने बताएका छन् ।

शनिबार टियु क्रिकेट मैदानमा त्रिकोणात्मक टि२० आई सिरिजको फाइनलमा नेदरल्यान्ड्सलाई १ सय ४२ रनको फराकिलो अन्तरले हराउँदै नेपालले उपाधि जितेको थियो । उपाधि जितेपछि बोल्दै कप्तान ज्ञानेन्द्र मल्लले युवा खेलाडीको प्रदर्शन तारिफ गर्दै नेपाली क्रिकेटको राम्रो संकेत भएको बताएका छन् ।

‘उपाधि जित्न भन्दा पनि हामीले राम्रो क्रिकेट खेल्यौं । हामीले पहिला भन्दा सकरात्मक क्रिकेट खेल्यौं । युवा खेलाडीले राम्रो प्रदर्शन गरे । त्यो विकेटले गर्दा पनि होला । टोलीमा धेरै जसो युवा खेलाडी थिए । आगामी दिनमा यो नेपाली क्रिकेटलाई एउटा राम्रो सन्देश हो’, उपाधि जितेपछि ज्ञानेन्द्रले भने ।

त्यसैमा उनले थपे,’ राम्रोसँग सदुपयोग गर्ने हो भने युवा खेलाडीले नेपाललाई यो भन्दा अझ माथि पुर्याउन सक्छन् ।’

नेपाली क्रिकेट टोलीको नेतृत्व सम्हालेपछि ज्ञानेन्द्रले पहिलो ट्रफी जितेका छन् । यो उपाधि तपाईंको लागि कतिको महत्वपूर्ण छ भन्ने प्रश्नमा ज्ञानेन्द्रले भने, ‘कप्तान भएपछि ट्रफी जित्नु राम्रो हो । जसरी टोलीले र खेलाडीले प्रदर्शन गर्छन् कप्तानको लागि त्यो भन्दा ठूलो कुरा हुन सक्दैन ।’

‘कोरोना महामारी हाम्रो हातमा छैन । राम्रो प्रतिस्पर्धा भएको खेल भई राख्ने हो भने राम्रो हुन्छ । धेरै भन्दा धेरै खेल खेल्न पाए धेरै राम्रो हुन्छ । ब्याटिङले जुन लय समायको छ त्यसलाई निरन्तर खेल चाहिन्छ । निरन्तर खेल हुँदा खेलाडीको मनोबल पनि उच्च हुन्छ’, उनले भने ।

चोटका कारण यस त्रिकोणात्मक सिरिज नेपाली क्रिकेट टोलीका अनुभवी खेलाडी पारस खड्काले खेलेनन् । ‘पारस मिस गर्यौं । सिनियर खेलाडी । ब्याटिङमात्र नभएर मैदान भित्र र बाहिर जसरी प्रभाव हुन्छ । त्यो मिस त भईनै हाल्छ । तर पनि यो युवा खेलाडीलाई एउटा अवसर पनि हो । सबैले राम्रोसँग सदुपयोग गरे जस्तो लाग्छ । युवा खेलाडीले प्रदर्शन एकदमै राम्रो संकेत हो र आगमी दिनमा नेपाली क्रिकेटलाई धेरै अघि लगेर जान सक्छन्,’ ज्ञानेन्द्रले भने ।

जितको लागि २ सय ३९ रनको विशाल विजयी लक्ष्य पछ्याएको नेदरल्यान्ड्स १७.२ ओभरमा ९६ रनमा अल आउट भएको थियो । त्यसअघि टियु क्रिकेट मैदानमा टस हारेर पहिला ब्याटिङ थालेको नेपालले निर्धारित २० ओभरमा ३ विकेट गुमाउँदै २ सय ३८ रन बनाएको थियो । जुन नेपालले यो टि२० आई इतिहासमै बनाएको सर्वाधिक ठूलो योगफल थियो । नेपाललाई विशाल योगफलमा पुर्याउन कुशल भुर्तेल, कुशल मल्ल र दीपेन्द्रसिंह ऐरीले फाइनलमा उत्कृष्ट प्रदर्शन गरेका थिए ।