काठमाडौं (हाम्रो खेलकुद) – राष्ट्रिय क्रिकेट टोलीका युवा ओपनर कुशल भुर्तेलले त्रिकोणात्मक टि२० आई सिरिजमा आफूलाई विश्वास गर्दै मौका दिएकोका प्रशिक्षक र टोलीलाई धन्यवाद दिएका छन् ।

फाइनलमा नेदरल्यान्ड्सलाई विशाल रन अन्तरले हराउँदै उपाधि जितेपछि कुशल भुर्तेलले पत्रकारसँग बोल्दै धन्यवाद दिएका हुन् । डेब्यू टि२० सिरिज खेलेका कुशल उत्कृष्ट प्रदर्शनका साथ विश्व कीर्तिमान बनाउँदै सर्वोत्कृष्ट खेलाडी (प्लेयर अफ द सिरिज) चुनिए ।

‘पक्कै पनि मेरो प्रदर्शन राम्रो भयो । धेरै पछि घरेलु मैदानमा उपाधि जित्यौं । विश्वकप छनोट आउँदैछ । हाम्रो राम्रो सुरुवात भएको छ’, उनले भने । नेपालले सन् २०१० मा आइसिसी डिभिजन ५ को उपाधि अमेरिकालाई हराउँदै टियु मैदानमा जितेको थियो । त्यसपछि नेपालले घरेलु मैदानमा उपाधि जित्न सकेको थिएन । अष्ट्रेलियामा हुने टि२० विश्वकपको लागि नेपालले २०२२ मा ग्लोबल छनोट खेल्ने छ ।

‘नेपालको लागि पहिला पनि खेलिसकेको थिए । डेब्यू भनेर त्यस्तो केहि छैन । मैले राम्रो क्रिकेट खेल खेल्नुपर्ने थियो । मलाई विश्वास गरेकोमा प्रशिक्षक र टोलीलाई धन्यावाद । अवसरमा प्रदर्शन पनि गरेर देखाए । खुसी लागि राखेको छ । मैले राम्रो सुरुवात दिन सके भने अन्त्य राम्रो गर्ने खेलाडी छन् भन्ने थाहा थियो । नभन्दै कुशल र दीपेन्द्रले राम्रो अन्त्य गरे’, उनले भने ।

नेपालले शनिवार फाइनलमा नेपालले नेदरल्यान्ड्सलाई १ सय ४२ रनको विशाल अन्तरले पराजित गर्दै सानदार जितको साथ च्याम्पियन बनेको थियो । कुशलले ७७ रनको अर्धशतकीय इनिङ खेलेका थिए । नेपाललाई च्याम्पियन बनाउन उत्कृष्ट प्रदर्शन गरेका कुशलले त्रिकोणात्मक टि२० आई सिरिजको कुल ५ खेलमा ४ अर्धशतक सहित २ सय ७८ रन बनाएका थिए ।

सर्वोत्कृष्ट खेलाडी चुनिएका कुशलले बजाजको दुई सय सिसिको बाइक पाएका छन् । कुशलले खेलेका ५ मध्य ४ खेलमा अर्धशतक प्रहार गरेका थिए । कुशलले पहिलो खेलमा नेदरल्यान्ड्ससँग डेब्यू गर्दै ६२ रन बनाएका थिए । दोस्रो खेलमा मलेसियासँग ६१ रनमा अविजित हुँदा नेदरल्यान्ड्ससँग ६२ रनमा आउट भएका थिए ।

मलेसियासँग १६ रनमा आउट हुँदा फाइनलमा ७७ रन बनाएका थिए । १४०.४० स्ट्राइकरेट रेटमा ब्याटिङ गर्दै कुल २४ चौका र १६ छक्का प्रहार गरेका थिए । कुशल सुरुवाती तीन खेलमा लगातार अर्धशतक प्रहार गर्ने टि२० आईका पहिलो खेलाडी हुन् ।