एजेन्सी – तीव्र गतिका बलर हसन अली र ओपनर ब्याट्सम्यान मोहम्मद रिजवानको उत्कृष्ट प्रदर्शनमा पाकिस्तानले जिम्बावेसँगको तीन टि२० आई सिरिज २–१ ले जितेको छ ।

अन्तिम खेलमा पाकिस्तानले घरेलु टोली जिम्बावेलाई २४ रनले पराजित गर्दै सिरिज जितेको हो । जितको लागि १ सय ६४ रनको विजयी लक्ष्य पछ्याएको जिम्बावेले निर्धारित २० ओभरमा ७ विकेट गुमाउँदै १ सय ४१ रन बनायो । जिम्बावेका युवा ओपनर वेस्ले मधेभरेले ४७ बलमा ७ चौका सहित सर्वाधिक ५९ रनको योगदान दिए । त्यस्तै तडिवनाशे मारुमानीले २६ बलमा ४ चौका सहित ३५ रनमा आउट भए । ब्रेन्डन टेलर २० र तराईसई मुसकंडाले १० रन बनाउन बाहेक अन्यले राम्रो प्रदर्शन गर्न सकेनन् । पाकिस्तानका तीव्र गतिका बलर हसन अलीले ४ ओभरमा १८ रन खर्चेर ४ विकेट लिए । हरिस रौफ २ र मोहम्मद हसनैनको नाममा १ विकेट रह्यो ।

त्यसअघि हरारेमा टस जितेर पहिला ब्याटिङ थालेको पाकिस्तानले निर्धारित २० ओभरमा ३ विकेट गुमाउँदै १ सय ६५ रन बनायो । ओपनर मोहम्मद रिजवान ६० बलमा ५ चौका र ३ छक्का सहित सर्वाधिक ८९ रनमा अविजित रहे । बाबर आजम ४६ बलमा ५ चौका सहित ५२ रनमा आउट भए । जिम्बावेका ल्यूक जोंगवे सर्वाधिक ३ विकेट लिए ।

हसन अली प्लेयर अफ द म्याच र मोहम्मद रिजवान प्लेयर अफ द सिरिज चुनिए । पाकिस्तान पहिलो खेलमा ११ रनले विजयी हुँदा दोस्रो खेलमा १९ रनले पराजित भएको थियो । पाकिस्तान र जिम्बावेबीच थप दुई टेष्ट सिरिज हुने छ । पहिलो टेष्ट विहिबारदेखि सुरु हुने छ ।