काठमाडौैं (हाम्रो खेलकुद) – राष्ट्रिय क्रिकेट टोलीका ओपनर कुशल भुर्तेल सहित पाँच खेलाडी अमेरिका र बेलायतमा बस्दै आएका नेपाली समर्थकबाट नगद पुरस्कार सहित सम्मानित भएका छन् । शनिवार सम्पन्न त्रिकोणात्मक टि२० सिरिजमा उत्कृष्ट प्रर्दशन गर्ने ओपनर कुशल भुर्तेल, आसिफ शेख, तीव्र गतिका बलर करण केसी, सोमपाल कामी र उपकप्तान दीपेन्द्रसिंह ऐरी नगद रकम सहित सम्मानित भएका हुन् ।

नेपाल क्रिकेट फ्यान क्लब र शालोट नर्थ क्यारोलिना नेपाली क्रिकेट ग्रुपले ९० हजार रुपैयाँ पाँच खेलाडीलाई प्रदान गरेका हुन् । प्लेयर अफ द म्याच चुनिने प्रत्येक खेलाडीलाई १२ हजार र उत्कृष्ट प्रदर्शन गरेका ओपनर आसिफ र कुशललाई १५–१५ हजार रुपैयाँ नगदले सम्मानित गरेका हुन् । सम्मानित खेलाडीलाई सोमबार राष्ट्रिय क्रिकेट टोलीका कप्तान ज्ञानेन्द्र मल्ल, पूर्व कप्तान पारस खड्का, त्रिकोणात्मक सिरिजका क्रिकेट म्यानेजर प्रकाश पौडेल र क्यानका राष्ट्रिय खेलकुद परिषद् (राखेप) सदस्य छुम्बी लामाले एक कार्यक्रमकाबीच रकम हस्तान्तरण गरेका थिए । अमेरिकाबाट ७० हजार र वेलायतबाट झण्डै २० हजार गरि कुल ९० हजार रकम कान्तिपुर खेल पत्रकार विनोद पाण्डेलाई पठाएका थिए ।

कुशल भुर्तेलले प्लेयर अफ द म्याच १२ हजार र उत्कृष्ट ओपनर गरि कुल २७ हजार रुपैयाँ सहित सम्मानित भए । आसिफ शेखले १५, दुई खेलमा प्लेयर अफ द म्याच चुनिएका करणले २४ हजार, दीपेन्द्र र सोमपाल समान १२–१२ हजार रुपैयाँबाट सम्मानित भए । कुशलले ओपनिङ उत्कृष्ट साझेदारीसँगै पहिलो खेलमा प्लेयर अफ द म्याच चुनिएका थिए । नेपाललाई उपाधि जिताउन कुशलले उत्कृष्ट प्रदर्शनका साथ प्लेयर अफ द सिरिज चुनिएका थिए । कुशलले ५ खेलमा ४ अर्धशतक सहित २ सय ७८ रन बनाएका थिए । पहिलो खेलमा नेपाल ९ विकेटले विजयी हुँदा ६२ रनको इनिङ खेल्दै प्लेयर अफ द म्याच चुनिएका थिए ।

दोस्रो खेलमा मलेसियालाई १ सय ९ रनमा अल आउट गर्न करण केसीले ३ ओभरमा १७ रन खर्चेर ३ विकेट लिदै प्लेयर अफ द म्याच चुनिएका थिए । तेस्रो खेलमा नेपालले २ सय ६ रन बनाएपनि ३ विकेटले पराजित हुन पुगेको थियो । नेपाल पराजित भएपनि ब्याटिङमा उत्कृष्ट प्रदर्शन गरेको भन्दै दीपेन्द्र सम्मानित भएका हुन् । दीपेन्द्रले ३० बलमा ६० रनको इनिङ खेलेका थिए । चौथो खेलमा मलेसियालाई ६९ रनले हराउन सोमपाल कामीले ४ ओभरमा १ मेडन सहित २० रन खर्चेर ३ विकेट लिदै प्लेयर अफ द म्याच चुनिएका थिए । नेपाललाई फाईनलमा १ सय ४२ रनको फराकिलो जित दिलाउन करण केसीले ३ ओभरमा ११ रन खर्चेर ३ विकेट लिदै प्लेयर अफ द म्याच चुनिएका थिए ।

आसिफ शेख र कुशल भुर्तेलले पहिलो खेलमा नेदरल्यानड्सविरुद्ध १ सय १६ र दोस्रो खेलमा मलेसियासँग १ सय २ रनको साझेदारी गर्दै विश्व कीर्तिमान बनाएका थिए । कुशल र आसिफ डेब्यू खेलमा शतकीय साझेदारी गर्ने र सुरुवाती दुई खेलमा दुई शतकीय साझेदारी विश्वकै टि२० क्रिकेटका पहिलो जोडी हुन् ।

सहयोग गर्ने समर्थकहरु

सचिन पराजुली (अमेरिका) : २ सय अमेरिकी डलर

नर्थ क्यारोलिना नेपाली क्रिकेट ग्रुप, शालोट: ३ सय अमेरिकी डलर

सौगात घिमिरे (अमेरिका) : १ सय अमेरिकी डलर

निराजन कुमार राजलावत : ५० अमेरिकी डलर (बेलायत)

विनोद विकाश सिम्खडा (बेलायत) : ५० अमेरिकी डलर

विश्वास हमाल (बेलायत) : ५० अमेरिकी डलर