एजेन्सी – अष्ट्रेलिया क्रिकेट टोलीका तीव्र गतिका बलर प्याट कमिन्सले भारतीय अस्पताललाई ५० हजार अमेरिकी डलर आर्थिक सहयोग गर्ने भएका छन् ।

इन्डियन प्रिमियर लिग (आइपिलए) मा कोलकाता नाइट राइडर्सबाट खेलि रहेका कमिन्सले कोरोना महामारीबाट लडि रहेको भारतलाई अक्सिजन खरिदका लागि भारतीय अस्पताललाई ५० हजार अमेरिकी डलर सहयोग गरेका छन् । कमिन्सले सामाजिक सञ्जाल मार्फत उक्त रकम दिने घोषणा गरेका छन् । उक्त रकम भारतीय प्रधानमन्त्री नरेन्द्र मोदीले स्थापना गरेको पिएम केयर्स कोषमा जाने छ ।

‘यहाँ आइपिएल जारी राख्नु उपयुक्त छ वा छैन भन्ने धेरै चर्चा भएको छ । आइपिएल हुँदा लकडाउनमा रहेका जनताले केहि घण्टा आनन्द र देशको लागि प्रत्येक दिन आराम प्रदान गर्छन् । खेलाडी भएको नाताले हामी लाखौ मानिससम्म पुग्न सक्छौं । जुन हामी राम्ररी प्रयोग गर्न सक्दछौैं । त्यो कुरालाई ध्यानमा राख्दै प्रधानमन्त्री केयर्स कोषलाई विशेष सहयोग गरेको छु’, उनले ट्वीटरमा लेखेका छन् ।

कमिन्सलाई सन् २०२० को आइपिएल अक्सनमा कोलकाता नाइट राइडर्सले १५ करोड ५० लाख भारु मा अनुबन्ध गरेको थियो । जारी सिजनको खेलमा कमिन्सले चेन्नई सुपर किंग्सविरुद्ध आठौं नम्बरमा ब्याटिङ गर्दै ६६ रनको इनिङ खेलेका थिए । कमिन्स विश्व टेष्ट वरियताका शीर्षक्रमका बलर हुन् ।

भारतमा पछिल्लो समय दिनप्रतिदिन कोरोना महामारीले विकराल रुप लिएको छ । आइतबार मात्र भारतमा ३ लाख बढी मानिसमा कोरोना संकमण देखिदा २ हजार ७ सय ६७ जनाको मृत्यु भएको थियो ।