काठमाडौं (हाम्रो खेलकुद) – नेपाली राष्ट्रिय क्रिकेट टोलीका युवा ओपनर कुशल भुर्तेल अन्तर्राष्ट्रिय क्रिकेट परिषद् (आइसिसी) को टि२० वरियतामा ठूलो फड्को मार्दै विश्वका चर्चित खेलाडीलाई पछि पारेका छन् ।

आइसिसीको नयाँ वरियतामा कुशल ९३ औं स्थानबाट ६१ औं स्थानमा उक्लिएका छन् । कुशलले एकै पटक ३२ स्थान सुधार गरेका छन् । भारतीय क्रिकेट टोलीका सूर्यकुमायर यादव, ऋषभ पन्त र अष्ट्रेलिया स्टिभ स्मिथ, इंग्ल्यान्डका जो रुट जस्ता विश्व चर्चित ब्याट्सम्यानलाई पछि पारेका छन् । पन्त ब्याटिङको वरियतामा ७१ औं, स्मिथ ६४ औं, सुर्य कुमार यादव ६६ र रुट ७८ औं स्थानमा छन् । कुशलको ४ सय ४२ रेटिङ प्वाइन्ट छ । पारस थप ४ स्थान खस्किदै ८८ औं स्थानमा पुगेका छन् ।

कप्तान ज्ञानेन्द्र मल्ल ९४ औं स्थानमा छन् । ज्ञानेन्द्रको ३ सय ५७ रेटिङ अंक छ । पारसको ३ सय ६२ रेटिङ अंक छ । ब्याटिङको शीर्षक्रममा इंग्ल्यान्डका डेविड मलान हुँदा अष्ट्रेलिया कप्तान अरोन फिन्च दोस्रो स्थानमा उक्लिएका छन् । पाकिस्तानका कप्तान बाबर आजम एक स्थान खस्किदै तेस्रो स्थानमा झरेका छन् । बलिङतर्फ लेगस्पिनर सन्दीप लामिछाने ७७ औं स्थानमा यथावत छन् । बलिङतर्फ दक्षिण अफ्रिका स्पिनर तबरेज शाम्सी, अफगानिस्तानका राशिद खान, अष्ट्रेलिया एस्टन अगर र इंग्ल्यान्डका आदिल राशिद : क्रमशः शीर्ष, दोस्रो, तेस्रो र चौथो स्थानमा छन् । अलराउन्डरतर्फ अफगानिस्तानका मोहम्मद नाबी शीर्ष स्थानमा छन् ।

नेपाल, मलेसिया र नेदरल्यान्ड्सबीचको त्रिकोणात्मक टि२० आई सिरिजमा नेपाली युवा ब्याट्सम्यान कुशल भुर्तेलले डेब्यू गर्दै उत्कृष्ट प्रदर्शन गरेपछि वरियतामा ठूलो फड्को मारेका हुन् । नेपाललाई च्याम्पियन बनाउन उत्कृष्ट प्रदर्शन गरेका कुशलले त्रिकोणात्मक टि२० आई सिरिजको कुल ५ खेलमा ४ अर्धशतक सहित २ सय ७८ रन बनाउँदै सर्वोत्कृष्ट खेलाडी चुनिएका थिए । कुशलले खेलेका ५ मध्य ४ खेलमा अर्धशतक प्रहार गरेका थिए ।

कुशलले पहिलो खेलमा नेदरल्यान्ड्ससँग डेब्यू गर्दै ६२ रन बनाएका थिए । दोस्रो खेलमा मलेसियासँग ६१ रनमा अविजित हुँदा नेदरल्यान्ड्ससँग ६२ रनमा आउट भएका थिए । मलेसियासँग १६ रनमा आउट हुँदा फाइनलमा ७७ रन बनाएका थिए । कुशल सुरुवाती तीन खेलमा लगातार अर्धशतक प्रहार गर्ने टि२० आईमा पहिलो खेलाडी समेत हुन् । नेपालले फाइनलमा नेदरल्यान्ड्सलाई १ सय ४२ रनको विशाल अन्तरले पराजित गर्दै उपाधि जितेको थियो ।