एजेन्सी – भारतमा दोस्रो चरणको कोरोना महामारीले विकराल रुप लिँदा इन्डियन प्रिमियर लिग (आइपिएल) २०२१ मा पनि असर र त्रास फैलिएको छ । भारतमा कोरोना महामारीले महाविकराल रुप लिँदै गर्दा अम्पायर र खेलाडी दुबैले विस्तारै आइपिएल छोड्न थालेका छन् ।

भारतीय प्रमुख अम्पायर नितिन मेनन र अष्ट्रेलिया पाउल रेफेलले ब्यक्तिगत कारण देखाउँदै आइपिएल छाडेका छन् । वर्तमान समयका भारतीय प्रमुख अम्पायर नितिन मेननले आफ्नो श्रीमती र आमा कोरोना संक्रमण देखिएपछि छोडेको भारतीय सञ्चार माध्यमले जनाएका छन् । नितिन आइसिसीको इलिट प्यानलमा रहेका वर्तमान समयका एकमात्र भारतीय अम्पायर हुन् । उनले भारत र इंग्ल्यान्डसँगको सिरिजमा गरेको अम्पायरिङ निर्णयले राम्रो चर्चा पाएको थियो । भारतमा तीव्र रुपमा कोरोना संक्रमण बढ्दा अष्ट्रेलिया सकरकारले यात्रामा प्रतिबन्ध लगाएको छ । जसको कारण पाउल रोफेलले पनि छाडेको बुझिएको छ ।

गत सोमबार अष्ट्रेलिया तथा रोयल च्यालेन्जर्स बेंगलोरका तीव्र गतिका बलर केन रिचर्ड्सन, स्पिनर एडम जाम्पा र राजस्थान रोयल्सका एन्डिुय टाईले नाम फिर्ता लिदै स्वदेश फर्किएका थिए । दिल्ली क्यापिटल्सका स्पिनर रविचन्द्रन आश्विनले कोरोना महामारीको कारण ब्यक्तिगत कारण देखाउँदै नाम फिर्ता लिई सकेका छन् । भारतमा बुधबार मात्र ३ लाख ८० हजारमा कोरोना संक्रमण देखिदा झण्डै ३ हजार ६ सयको मृत्यु भएको थियो ।

भारतमा कोरोनाले महाविकराल रुप लिदा आइपिएल भने जारी रहँदै आएको छ । हालसम्म २३ खेल सकिदा चेन्नई सुपर किंग्स ५ खेलमा १० अंक सहित शीर्ष स्थानमा छ । बिहिबार आइपिएलका दुई खेल हुँदै छन् । पहिलो खेलमा मुम्बई इन्डियन्स र राजस्थान रोयल्सबीच दिल्लीमा दिउँसो ३ : ४५ मा सुरु हुने छ । दोस्रो खेल ७ : ४५ मा दिल्ली क्यापिटल्स र कोलकाता नाइट राइडर्सबीच अहमदाबादमा सुरु हुने छ ।