एजेन्सी – इन्डियन प्रिमियर लिग (आइपिएल) २०२१ को २५ औं खेलमा आज कोलकाता नाइट राइडर्स र दिल्ली क्यापिटल्सबीच प्रतिस्पर्धा हुँदै छ । खेल नेपाली समय अनुसार बेलुका ७ : ४५ पछि नरेन्द्र मोदी स्टेडियम अहमदाबादमा सुरु हुने छ ।

दिल्ली कोलकातामाथि जितका साथ दोस्रो स्थानमा उक्लिने सोचमा छ । विशाल जित निकाल्न सके चेन्नई सुपर किंग्सलाई नेट रनरेटले पछि पार्दै दिल्ली शीर्षस्थानमा उक्लिने छ । कोलकाता दिल्लीलाई हराउँदै चौथो स्थानमा उक्लिने सोचमा छ । दिल्ली ऋषभ पन्त र कोलकाता ओईन मोर्गनको कप्तानीमा मैदान उत्रने छ ।

पछिल्लो खेलमा दिल्ली रोयल च्यालेन्जर्स बेंगलोरसँग १ रनले पराजित हुन पुगेको थियो । जसक्रममा कप्तान ऋषभ पन्त र शिम्रन हेटमायरले अर्धशतकीय इनिङ खेलेपनि टोलीको हार टार्न सकेका थिएनन् । हेटमायरको लय फर्किनु दिल्लीको लागि सकरात्मक कुरा हो । पृथ्वी शा र शिखर धवनलाई ओपनिङमा ठूलो इनिङ खेल्न आवश्यक देखिन्छ ।

स्टिभ स्मिथको स्थानमा दिल्लीले इंग्ल्यान्डका साम विलिंग्सलाई मौका दिनसक्छ । कागिसो रबाडा प्रमुख हतियार हुन् । स्मिथलाई बेन्चमा राखेर अजिक्या रहानेलाई मौका दिदै दिल्लीले रबाडा र एनरिच नोर्कियाको जोडिलाई मैदान उतार्न सक्छ । यस सिजनमा राम्रो प्रदर्शन गरेका आवेश खान कोलकातालाई टाउको दुखाईको ब्याट्सम्यान बन्न सक्छन् । स्पिनरमा अक्षर पटेल र अमित मिश्रा छन् ।

यता कोलकाता पछिल्लो खेलमा राजस्थान रोयल्ससँग ६ विकेटले पराजित भएको थियो । कोलकातालाई प्ले अफको सम्भावना कायमै राख्न आजको खेल जित्नै पर्ने दबाब छ । ओपनर सुभमन गिललाई टोलीमा आक्रामक सुरुवात दिन आवश्यक देखिन्छ । गिलको स्थानमा भारतीय घरेलु क्रिकेटमा उच्च प्रदर्शन गर्दै आएका वेंकटेश अय्यर राम्रो विकल्प सावित हुन सक्छन् ।

नितिश राना, कप्तान ओईन मोर्गन र दीनेश कार्तिकलाई ठूलो इनिङ खेल्न दबाब छ । अलराउन्डर आन्द्रे रसेलबाट कोलकाता विष्फोटक इनिङ चाहन्छ । तीव्र गतिका बलर प्याट कमिन्स पनि तल्लोक्रममा ठूला सटको क्षमता राख्छन् । तीव्र गतिको हतियार कमिन्स, प्रसिद्ध कृष्णा र शिवम माभी हुने छन् । स्पिनरमा बरुण चक्रवर्ती प्रमुख हतियार हुन् ।

हेड टु हेड :

आइपिएलमा दिल्ली र कोलकाताबीच कुल २६ खेल भएको छ । कोलकाता १४ खेलमा विजयी हुँदा ११ खेलमा पराजित भएको छ । १ खेलको नतिजा विहिन छ । गतवर्ष पहिलो खेलमा दिल्ली १८ रनले विजयी हुँदा दोस्रो खेलमा ५९ रनले पराजित भएको थियो । पछिल्ला पाँच खेल मध्य चार खेलमा दिल्ली विजयी भएको छ ।

अंक तालिका

चेन्नई सुपर किंग्स ६ खेलमा ५ जित र १ मा हार सहित १० अंक सहित शीर्षस्थानमा छ । रोयल च्यालेन्जर्स बेंगलोर ६ खेलमा ५ मा जित र १ मा हार सहित १० अंक भएपनि नेट रनरेटको आधारमा दोस्रो स्थानमा छ । दिल्ली क्यापिटल्स ६ खेलमा ४ मा जित र २ मा हार सहित ८ अंक सहित तेस्रो स्थानमा छ । साविक विजेता मुम्बई इन्डियन्स ५ खेलमा ३ मा हार र २ मा जित सहित ४ अंक बटुल्दै नेट रनरेटको आधारमा चौथो स्थानमा छ ।

कोलकाता ६ खेलमा ४ मा हार र २ जित सहित ४ अंकका साथ पाँचौ स्थानमा छ । पन्जाब ६ खेलमा ४ मा हार र २ मा जित सहित ४ अंक जोड्दै छैटौं स्थानमा छ । राजस्थान रोयल्स ५ खेलमा ३ मा हार र २ मा जित सहित ४ अंकका साथ सातौं स्थानमा छ । सनराइजर्स हैदराबाद ६ खेलमा ५ मा हार र १ मा जित सहित २ अंक जोड्दै पुछारमा छ ।