एजेन्सी – राजस्थान रोयल्सले इन्डियन प्रिमियर लिग (आइपिएल) २०२१ को २४ औं खेलमा मुम्बई इन्डियन्सलाई १ सय ७२ रनको चुनौतीपूर्ण लक्ष्य दिएको छ । दिल्लीमा टस हारेर ब्याटिङ थालेको राजस्थानले निर्धारित २० ओभरमा ४ विकेट गुमाउँदै १ सय ७१ रन बनायो ।

राजस्थानका कप्तान सञ्जु स्यामसनले सर्वाधिक ४२ रनको योगदान दिए । युवा ब्याट्सम्यान यशस्वी जैसवाल र विकेटकिपर जस बटलरले पहिलो विकेटका लागि ७.४ ओभरमा ६६ रनको साझेदारी गर्दै राजस्थानलाई राम्रो सुरुवात दिलाएका थिए । स्पिनर राहुल चाहरले विकेटकिपर क्विन्टन डी ककबाट बटलरलाई ४१ रनमा स्टम्पिङ आउट गर्दै मुम्बईलाई पहिलो सफलता दिलाए ।

बटलरले ३२ बलमा ३ चौका र ३ छक्का प्रहार गरे । यशस्वी जैसवाल २० बलमा २ चौका र २ छक्का सहित ३२ रनमा क्याच आउट भए । तीव्र गतिका बलर ट्रेन्ट बोल्टले १८ औं ओभरको चौथो बलमा बोल्ड आउट गर्नुअघि कप्तान सञ्जु स्यामसनले २७ बलमा ५ चौका सहित ४२ रन जोडे ।

शिवम दुबे ३१ बलमा २ चौका र २ छक्का सहित ३५ रनमा जस्प्रित बुमराहबाट कटएण्ड बोल्ड आउट हुन पुगे । डेविड मिलर ७ र रियान पराग ८ रनमा अविजित रहे । मुम्बईका राहुल चाहरले ४ ओभरमा ३३ रन खर्चेर २ विकेट लिए । ट्रेन्ट बोल्ट र जस्प्रित बुमराहको नाममा १–१ विकेट रह्यो ।