काठमाडौं (हाम्रो खेलकुद) – नेपाली राष्ट्रिय क्रिकेट टोलीका लेगस्पिनर सन्दीप लामिछानेले कोरोना महामारीको दोस्रो लहरले नेपालमा परेको असरलाई रोकथाम नियतन्त्र गर्न अभियान थालेका छन् ।

अभियानमा टिम सन्दीपको तर्फबाट तीन लाख सहयोग गर्दै सोमबार सुरुवात भएको छ । सेञ्चुरी कर्मसियल विकास वैंक लिमिटेड पुतलि सडकमा खाता खोल्दै सन्दीपले अभियान सुरु गर्ने सामाजिक सञ्जालमार्फत जानकारी दिएका छन् । ‘अनियन्त्रियण हुँदै गएको यस विषम परिस्थितिमा तपाईं हामी सबैले दृढ आत्मबलका साथ फेरि एकचोटि नेपाल र नेपाली जनताका निम्ति, एकजुट भई आपसी सद्भाव र सहकार्यले यस कठिन समयको सामना गर्नु पर्ने बेला आएको छ । हाम्रो एकता, दृढ आत्मबल, सकारात्मक सोच, आपसी सद्भाव र सहकार्यले कोरोना विरुद्धको यो लडाइँ पक्कै पनि जित्न सक्छौँ’, सन्दीपले फेसबुकमा भनेका छन् ।

त्यसैमा उनले थपेका छन्, ‘यसका निम्ति एकजुट भई आ-आफ्नो तर्फबाट सहयोग गरिदिनुहुन देश विदेशमा रहनुभएका मेरा सम्पूर्ण शुभ चिन्तकहरूमा हार्दिक अनुरोध गर्दछु । सहयोगका निम्ति आजै मात्र एउटा नयाँ बैंक खाता खोलेको छु र यसमा जम्मा हुने सम्पूर्ण रकम कोभिड सङ्क्रमण रोकथाम ,नियन्त्रण एवम् सङ्क्रमितको उपचारका निम्ति उपलब्ध गराउने विश्वास दिलाउन चाहन्छु’ ।

सङ्कलन गरिएको रकमको सम्पूर्ण अपडेट ‘टिम सन्दीप’ ले गर्ने जनाएका छन् । सहयोगबाट प्राप्त रकम स्थानीय निकाय, प्रशासन कार्यालयको रोहवरमा अति प्रभावित क्षेत्र, स्थानीय निकायमा आवश्यकता तथा प्राथमिकताको आधारमा वितरण गरिने जानकारी गराएका छन् । टिम सन्दीपको तर्फबाट ३ लाख सहयोग गर्दै अभियान सुरु भएको छ । सन्दीप लामिछानेको नाममा रहेको सेञ्चुरी कर्मसियल बैंक लिमिटेडको खाता नम्बर ०१७००००३५३ मा रकम सहयोग सहयोग गर्न सक्ने सन्दीपले जानकारी दिएका छन् ।