एजेन्सी – दक्षिण अफ्रिका आक्रामक ब्याट्सम्यान एबी डि भिलियर्स राष्ट्रिय टोलीमा नफर्कने भएका छन् । दक्षिण अफ्रिका क्रिकेट बोर्डले उनीसँग छलफल पश्चात सन्न्यास फिर्ता नहुने स्पष्ट पारेको छ ।

दक्षिण अफ्रिकाले मंगलबार वेस्टइन्डिज र आयरल्यान्डसँग खेल्ने टि२० टोली घोषणा गरेको छ । डिभिलियर्सले आगमी अक्टोबर नोभेम्बरमा भारतमा हुने टि२० विश्वकप खेल्ने इच्छा राख्दै आएको खबर सार्वजनिक भएको थियो । आयरल्यान्ड र वेस्टइन्डिजसँगको टि२० सिरिज विश्वकप तयारीको रुपमा रहेको छ ।

डि भिलियर्सले इन्डियन प्रिमियर लिग (आइपिएल) २०२१ मा रोयल च्यालेन्जर्स बेंगलोरबाट सुरुवाती खेलमा राम्रो प्रदर्शन गरेपछि पूनरागमनको आशा पनि बढेको थियो । तर खेलाडीसँग नै छलफलपछि उक्त सन्न्यास नै अन्तिम रहेको दक्षिण अफ्रिकाले स्पष्ट पारेको छ ।

यस सिजन बीचमा नै रोकिएको आइपिएलमा डि भियिलर्सले ६ इनिङमा २ सय ७ रन बनाएका थिए । कोलकाता नाइट राइडर्सलाई ३८ रनले पराजित गर्न नायक बन्ने क्रममा ३४ बलमा ७६ रनको प्लेयर अफ द म्याच इनिङ खेलेका थिए ।

डि भिलियर्सले सन् २०१८ मा सबैलाई आश्चर्य पार्दै अन्तर्राष्ट्रिय क्रिकेटबाट सन्न्यास लिएका थिए । २०१९ मा इंग्ल्यान्डमा भएको एकदिवसिय विश्वकपमा एवी डिभिलियर्सले टोलीलाई आवश्यक भए आफू फर्कन तयार भएको जनाएका थिए । विश्वकप मुखमै सन्न्यास लिएका डी भिलियर्सको प्रस्तावलाई दक्षिण अफ्रिकाले ठाडै अस्वीकार गरेको थियो ।

सन् २०२० मा अष्ट्रेलियामा हुने टि२० विश्वकपमा पर्न आइपिएलमा उच्च प्रदर्शन गर्नु पर्ने दक्षिण अफ्रिकाले जनाएको थियो । तर कोरोनाको कारण उक्त विश्वकप हुन सकेन । अघिल्लो महिनामात्रै डी भिलियर्सले आफ्नो सन्न्यास फिर्ता लिन दक्षिण अफ्रिका प्रशिक्षक तथा सँगै खेल्दाका साथी मार्क बाउचरसँग छलफल गर्ने बताएका थिए ।

विश्व क्रिकेटकै सर्वोत्कृष्ट ब्याट्सम्यान डी भिलियर्सले दक्षिण अफ्रिकाबाट १ सय १४ टेष्ट, २ सय २८ ओडिआई र ७८ टि२० आई खेल खेलेका छन् । उक्त समय डि भिलियर्सले आफू थकित भएको बताउँदै सन्न्यास लिएका थिए । लगातार उच्च प्रदर्शन गरेका डि भिलियर्सको सन्न्यासले क्रिकेट जगत चकित परेको थियो ।