एजेन्सी – न्युजिल्यान्डका ओपनर देभन कन्वेले इंग्ल्यान्डसँगको पहिलो टेष्ट डेब्यू खेलमै सानदार शतक प्रहार गरेका छन् । लर्ड्स क्रिकेट मैदानमा टस जितेर पहिला ब्याटिङ थालेको न्युजिल्यान्डले पहिलो दिन तेस्रो सेसनको खेल जारी ६१ रहँदा ३ विकेट गुमाउँदै १ सय ८५ रन बनाएको छ ।

डेब्यू खेल खेलि रहेका कन्वे १ सय ६४ बलमा ११ चौका सहित १ सय ३ रनमा खेलि रहेका छन् । हेनरी निकोलस १९ रनमा अविजित छन् ।
कन्वेले १ सय ६३ बलमा ११ चौका सहित करिअरको पहिलो टेष्ट खेलमै शतक प्रहार गरेका छन् । कन्वेले ओली रोबिन्सनलाई ६१ औं ओभरको दोस्रो बलमा चौका प्रहार गर्दै शतक प्रहार गरेका छन् ।

सिमित ओभरको क्रिकेटमा उत्कृष्ट प्रदर्शन गरेपछि न्युजिल्यान्डले कन्वेलाई डेब्यू गराएको थियो । कन्वेले टेष्टमा पनि सानदार प्रदर्शन गरेका छन् । टेष्ट डेब्यूमै शतक प्रहार गर्ने कन्वे विश्वका १ सय ११ औं खेलाडी हुन् । न्युजिल्यान्डबाट टेष्ट डेब्यूमै शतक हान्ने १२ औं खेलाडी बनेका छन् । लर्ड्समा डेब्यूमा शतक हान्ने कन्वे छैटौं खेलाडी हुन् ।

न्युजिल्यान्डका ओपनर टम लाथम र कन्वेले १६ ओभरमा ५८ रनको साझेदारी गर्दै राम्रो सुरुवात दिलाएका थिए । इंग्ल्यान्डका डेब्यू खेल खेलि रहेका तीव्र गतिका बलर ओली रोबिन्सनले २३ रनमा बोल्ड आउट गर्दै पहिलो सफलता दिलाए । लाथमले ५७ बलमा २ चौका प्रहार गरे । कप्तान केन विलियम्सनलाई जेम्स एन्डरसनले १३ रनमा बोल्ड आउट गरे । ओली रोबिन्सनलेनै रस टेलरलाई १४ रनमा बोल्ड आउट गरेका थिए ।