एजेन्सी – इंग्ल्यान्डका तीव्र गतिका बलर ओली रोबिन्सन ९ वर्ष अघिको ट्विटको कारण अन्तर्रष्ट्रिय सबै शैलीको क्रिकेटबाट निलम्बनमा परेका छन् । न्युजिल्यान्डसँगको पहिलो टेष्टमा डेब्यू गर्दै २७ वर्षिय ओली रोबिन्सनले उत्कृष्ट प्रदर्शन गर्दै पहिलो इनिङमा ४ र दोस्रो इनिङमा ३ विकेट लिएका थिए ।

डेब्यूमा उनको उत्कृष्ट प्रदर्शनसँगै २०१२/१३ मा सामाजिक सञ्जाल ट्विटरमा उनले अश्लिलता र जातिवादलाई जोडेर गरिएको ट्विट बाहिरिएको थियो । जसको अनुसान गरि रहेको इंग्ल्यान्ड क्रिकेट बोर्डले पहिलो टेष्ट खेल सकिएपछि ओली रोबिन्सन निलम्बनमा परेको जनाएको थियो । रोबिन्सनले इंग्ल्यान्डको क्याम्प छाडि सकेका छन् । दोस्रो टेष्टमा उपलब्ध हुने छैनन् ।

रोबिन्सनले किशोर अवस्थामा गरेको ट्विटबारे बुधबार माफी पनि मागेका थिए । रोबिन्सनले बलिङसँगै पहिलो इनिङमा ब्याटिङमा ४२ रनको महत्त्वपूर्ण योगदान दिएका थिए । उनको अनुसाशनबारे अनुसन्धान नासकिंदासम्म उनी निलम्बनमा रहने छन् । प्रतिबन्ध लगाउने वा सफाई दिने अनुसन्धानपछि थाहा हुने छ । झण्डै एकदशक अघि किशोर अवस्थामा ट्विट गरेको कारण उनले सफाई पाउने सम्भावना बढी छ ।

अनुसाशनको क्रममा इंग्ल्यान्डले निकै कडाई गर्दै आएको छ । सन् २०१९ मा प्रमुख ओपनर एलेक्स हेल्सले अनाधिकृत औषधि प्रयोग गरेको कारण एकदिवसिय विश्वकप मुखमै टोलीबाट हटाएको थियो । त्यसपछि हेल्सले टोलीमा मौका पाउन सकेका छैनन् ।

दोस्रो टेष्टमा रोबिन्सन उपलब्ध नहुने भएपछि तीव्र गतिको युनिटमा मार्कवुड, जिमी एन्डरसन र स्टुअर्ट ब्रोडलाई ओली स्टोनले साथ दिने सम्भावना छ । दोस्रो टेष्ट बिहिबार देखि सुरु हुने छ ।