एजेन्सी – न्युजिल्यान्डका कप्तान केन विलियम्सनले इंग्ल्यान्डसँगको दोस्रो टेष्ट खेल गुमाउने भएका छन् । विहिवार देखि सुरु हुने दोस्रो टेष्ट विलियम्सनले बायाँ हातको कुँइनोमा चोटका कारण गुमाउने भएका छन् ।

विलियम्सनले दोस्रो टेष्ट गुमाउँदा कप्तानी ओपनर टम लाथमले गर्ने छन् । तेस्रो नम्बरमा ब्याटिङ विल यंगले लिने छन् । ‘विलियम्सनलाई टेष्टमा गुमाउने यो निर्णय पक्कै सजिलो होईन । तर हामी सोच्छौं यो निर्णय सहि छ’, न्युजिल्यान्डका प्रशिक्षक ग्यारी स्टिडले भनेका छन् । आइसिसी विश्व टेष्ट च्याम्पियनसिप फाइनललाई ध्यानमा राख्दै यो निर्णय लिएको स्टीडले बताएका छन् । फाइनलको लागि विलियम्सन तयार हुनेमा आफू विश्वस्त पनि रहेको उनी बताउँछन् ।

टेष्ट च्याम्पियनसिप फाइनल आगमी जुन १८ मा इंग्ल्यान्डको साउथह्याप्टमा हुँदै छ । फाइनलमा भारत र न्युजिल्यान्डबीच प्रतिस्पर्धा हुने छ । उक्त फाइनल तयारी स्वरुप न्युजिल्यान्डले इंग्ल्यान्डसँग दुई टेष्ट सिरिज खेल्ने व्यवस्था मिलाएको थियो । पहिलो टेष्ट बराबरीमा सकिएको थियो ।

केन विलियम्सन पहिलो इनिङमा १३ रन र दोस्रो इनिङमा एक रनमा आउट भएका थिए । डेब्यू खेल खेलेका न्युजिल्यान्डका ओपनर डेभन कन्वेले दोहोरो शतकीय इनिङ खेलेका थिए । इंग्ल्यान्ड र न्युजिल्यान्डबीचको दोस्रो तथा अन्तिम टेष्ट खेल विहिबार देखि बर्मिंघममा सुरु हुने छ ।