एजेन्सी – न्युजिल्यान्डविरुद्ध दोस्रो टेष्ट खेलमा घरेलु टोली इंग्ल्यान्डले मध्यम प्रदर्शन गरेको छ । बर्मिंघममा टस जितेर पहिला ब्याटिङ रोजेको इंग्ल्यान्डले पहिलो दिनको समाप्तिमा ९० ओभरमा ७ विकेटको क्षतिमा २ सय ५८ रन जोडेको छ ।

तल्लोक्रमका ब्याट्सम्यान ड्यानियल लरेन्स एक सय बलमा ११ चौका सहित ६७ रनमा अविजित छन् । लरेन्सलाई मार्कवुड १६ रनबाट साथ दिने छन् । इंग्ल्यान्डलाई ओपनर रोरी बर्न्स र डोमिनिक सिब्लले पहिलो विकेटका लागि ३० ओभरमा ७२ रनको संयमित साझेदारी गरेका थिए । तीव्र गतिका बलर म्याट हेनरीले सिब्लेलाई ३५ रनमा टम ब्लन्डेलबाट क्याच गराउँदै पहिलो विकेटको साझेदारी तोडेका थिए ।

निल वाग्ररले ज्याक क्रलीलाई शून्यमा क्याच आउट गराए । कप्तान जो रुट पनि धेरै समय क्रिजमा विताउन सकेनन् । म्याट हेनरीले रुटलाई चार रनमा क्याच आउट गराए । इंग्ल्यान्डको इनिङ सम्हालेका रोरी बन्सलाई ट्रेन्ट बोल्टले लाथमबाट ८१ रनमा क्याच आउट गराए । रोरी बर्न्सले १ सय ८७ बल खेल्दै १० चौका प्रहार गरे । ओली पोप १९, जेम्स ब्रेसी शून्य र ओली स्टोन २० रनमा आउट भए ।

न्युजिल्यान्डका ट्रेन्ट बोल्ट, म्याट हेनरी र अजाज पटेलले २–२ विकेट लिएका छन् । दुई टेष्ट सिरिज अन्तर्गत पहिलो खेल बराबरीमा सकिएको थियो ।