एजेन्सी – शुक्रबार देखिसुरु हुने विश्व टेष्ट च्याम्पियनसिप फाइनलको लागि भारतले आफ्नो प्लेइङ-११ घोषणा गरेको छ । भारतले विराट कोहलीको कप्तानीमा विहिबार साँझ फाइनल खेल्ने प्लेइङ-११ घोषणा गरेको छ । भारत ६ प्रमुख ब्याट्सम्यान, दुई स्पिनर र तीन तीव्र गतिका बलरका साथ फाइनल खेल्ने भएको छ ।

भारतको अन्तिम १५ टोलीबाट स्पिन अलराउन्डर हनुमा विहारी, विकेटकिपर ऋद्धिमान शाह, तीव्र गतिका बलर मोहम्मद शिराज र उमेश यादवलाई बेन्चमा राखेको छ । तीव्र गतिका बलरमा जस्प्रित बुमराह, ईशान्त शर्मा र मोहम्मद शामी छन् । भारतको बलिङ सुरुवात शामी र शर्माले गर्ने छन् । उत्कृष्ट प्रदर्शन गर्दै आएका अलराउन्डर रविचन्द्रन आश्विन र जडेजा दुबैले प्लेइङ-११ मा स्थान बनाएका छन् । यी दुई खेलाडीलाई मौका दिँदा भारतको ब्याटिङमा गहिराई बनेको छ । तर साउथह्याप्टनमा तीव्र गतिका बलरलाई बढी सहयोगी रहँदै आएको छ । यो अवस्थामा भारतले तीन मात्र तीव्र गतिका बलर खेलाउने जोखिम लिएको छ ।

भारतले विकेटकिपरमा पछिल्लो समय उत्कृष्ट प्रदर्शन गर्दै आएका युवा ब्याट्सम्यान ऋषभ पन्तलाईनै निरन्तरता दिएको छ । अनुभवी विकेटकिपर ऋद्धिमान शाहलाई बेन्चमा राखेको छ । भारतको ओपनिङ रोहित शर्मा र सुभमन गिलले गर्ने छन् । तेस्रो नम्बरमा चेतेश्वर पुजारा र चौथो नम्बरमा विराट कोहलीले ब्याटिङ गर्ने छन् । पाँचौं नम्बरमा अजिंक्या रहाणे र छैटौं नम्बरमा पन्त रहने छन् । सातौं र आठौंमा आश्विन जडेजा रहने छन् । शामी, बुमराह र ईशान्त अन्तिम क्रममा रहने छन् ।

आइसिसीका टेष्ट वरियता शीर्ष नौं टोलीबीच दुई बर्ष चलेको टेष्ट च्याम्पियनसिपमा भारत शीर्ष र न्युजिल्यान्ड दोस्रो स्थानमा रहँदै फाइनल खेल्न लागेका हुन् । टेष्ट च्याम्पियनसिपको विजेताले १.६ मिलियन डलर प्राप्त गर्ने छ । उप विजेता अर्थात दोस्रो हुने टोलीले ८ लाख अमेरिकी डलर प्राप्त गर्ने छन् ।

न्युजिल्यान्डले फाइनल अघि इंग्ल्यान्डसँग दुई टेष्ट सिरिज खेल्दै १–० ले जितेको छ । भारतले आन्तरिक अभ्यास गरेको थियो । टेष्ट च्याम्पियनसिप फाइनल बराबरी भएमा भने संयुक्त रुपमा विजेता घोषणा गरिने छ । साउथह्याप्टनमा विश्वका दुई उत्कृष्ट टोलीबीच हुने फाइनल निकै प्रतिस्पर्धात्मक र रोचकको अपेक्षा गरिएको छ । न्युजिल्यान्डले भने प्लेइङ-११ घोषणा गर्न बाँकी छ ।

फाइनल खेल्ने भारतको प्लेइङ ११ : रोहित शर्मा, सुभमन गिल, चेतेश्वर पुजारा, विराट कोहली (कप्तान), अजिक्या रहाने (उपकप्तान), ऋषभ पन्त (विकेटकिपर), रविचन्द्रन आश्विन, रविन्द्र जडेजा, जस्प्रित बुमराह, ईशान्त शर्मा र मोहम्मद शामी ।